हडपसर ते चाकण... पुण्याचा चेहरामोहरा बदलणार! दोन नवीन महामार्गांच्या कामाला मुहूर्त लागला; पाहा तुमच्या भागाला काय मिळणार?
सार
Pune Traffic Congestion Solution : राज्य सरकारने पुणे जिल्ह्यातील वाहतूक कोंडी कमी करण्यासाठी दोन मोठ्या रस्ते प्रकल्पांना मंजुरी दिली आहे. तळेगाव-चाकण-शिक्रापूर आणि हडपसर-यवत या दोन महामार्गांच्या कामाला लवकरच सुरुवात होणारय.
पुणे : पुणे शहराचा श्वास गुदमरणाऱ्या वाहतूक कोंडीतून नागरिकांना मुक्त करण्यासाठी राज्य सरकारने एक मोठे पाऊल उचलले आहे. महाराष्ट्र राज्य पायाभूत सुविधा विकास महामंडळाने (MSIDC) पुणे जिल्ह्यातील दोन अतिशय महत्त्वाकांक्षी रस्ते प्रकल्पांच्या मार्गातील सर्व अडथळे दूर केले आहेत. तळेगाव-चाकण-शिक्रापूर आणि हडपसर-यवत या दोन महामार्गांच्या कामाला आता प्रत्यक्ष वेग मिळणार आहे.
पुणे आणि परिसराचा चेहरामोहरा बदलणारे दोन प्रकल्प
१. तळेगाव-चाकण-शिक्रापूर महामार्ग (NH 548 D): पुण्यातील औद्योगिक पट्ट्यासाठी हा मार्ग 'लाईफलाईन' ठरणार आहे.
एकूण लांबी: ५३.२० किलोमीटर.
खास वैशिष्ट्य: यातील सुमारे २४ किलोमीटरचा रस्ता हा 'उन्नत मार्ग' (Elevated Road) स्वरूपात असेल. यामुळे जड वाहतूक थेट वरून जाईल आणि स्थानिक वाहतुकीचा अडथळा दूर होईल.
२. हडपसर-यवत महामार्ग (पुणे-सोलापूर रोड): पुणे-सोलापूर महामार्गावरील कोंडी फोडण्यासाठी हा प्रकल्प गेमचेंजर ठरेल.
स्वरूप: सध्याच्या रस्त्याचे सहा पदरीकरण तर केले जाईलच, पण त्यासोबतच एक अवाढव्य सहा पदरी उन्नत महामार्ग देखील उभारला जाणार आहे. यामुळे लांब पल्ल्याचा प्रवास अत्यंत सुसाट होईल.
कधी सुरू होणार काम?
या दोन्ही प्रकल्पांच्या निविदा प्रक्रियेतील सर्व तांत्रिक अडथळे आता संपले आहेत. 'मोंटेकार्लो लिमिटेड' या नामांकित कंपनीकडे या कामाची जबाबदारी सोपवण्यात आली आहे. राज्य सरकारची अंतिम मंजुरी मिळताच, अवघ्या एका महिन्यात प्रत्यक्ष कामाला सुरुवात करण्याचे एमएसआयडीसीचे नियोजन आहे.
पुणेकरांना काय होणार फायदा?
वेळेची बचत: चाकण आणि हडपसर पट्ट्यातील तासनतास चालणारी वाहतूक कोंडी इतिहासजमा होईल.
औद्योगिक विकास: तळेगाव-चाकण पट्ट्यातील कंपन्यांच्या मालवाहतुकीला मोठा वेग मिळेल.
सुरक्षित प्रवास: रस्ते रुंदीकरण आणि उन्नत मार्गांमुळे अपघातांचे प्रमाण कमी होण्यास मदत होईल.
पुढील दोन ते तीन वर्षांत हे दोन्ही महामार्ग पूर्ण क्षमतेने वाहनचालकांसाठी खुले करण्याचे उद्दिष्ट सरकारने ठेवले आहे.