Bus Fare Hike: दिवाळीत खासगी बसवाल्यांनी जास्त तिकीट घेतलं? फक्त इथे तक्रार करा, आरटीओ आता थेट कारवाई करणार

Bus Fare Hike: दिवाळीच्या काळात खासगी बस चालक मनमानीपणे तिकीट दर वाढवतात. यावर आळा घालण्यासाठी, प्रादेशिक परिवहन विभागाने (आरटीओ) एसटीच्या दीडपट दरापेक्षा जास्त शुल्क आकारल्यास थेट कारवाई करण्याचा निर्णय घेतला आहे. 

दिवाळीत खासगी बसवाल्यांची मनमानी थांबणार!

पुणे: दिवाळीच्या सणासुदीच्या काळात गावाकडे जाणाऱ्यांची संख्या मोठी असते आणि याच संधीचा गैरफायदा घेत अनेक खासगी बस चालक तिकिटांचे दर मनमानीपणे वाढवतात. मात्र यंदा प्रवाशांच्या लुटीला आळा बसणार आहे. प्रादेशिक परिवहन विभागाने या प्रकारांवर थेट कारवाई करण्याचा निर्णय घेतला आहे.

तिकिटांचे दर वाढवले? आरटीओकडून थेट कारवाई!

आरटीओ अधिकारी अर्चना गायकवाड यांनी स्पष्ट शब्दांत सांगितले की, एसटीच्या अधिकृत तिकीट दराच्या दीडपट इतपतच तिकिटदर आकारण्याची परवानगी खासगी बस चालकांना आहे. त्यापेक्षा अधिक दर घेतल्यास संबंधित चालक किंवा बस मालकावर कठोर कारवाई केली जाईल. अशा कोणत्याही तक्रारी मिळाल्यास कारवाई "तुरंत" केली जाईल, असा इशारा त्यांनी दिला. 

तक्रार करताना पुढील माहिती द्यावी

प्रवाशाचे नाव

मोबाईल क्रमांक

तिकिटाचा फोटो (पुरावा) 

तिकिटाच्या जादा वसुलीची तक्रार कशी कराल?

जर तुम्हाला कोणी जास्त तिकिटदर आकारला असेल, तर खालीलप्रमाणे तक्रार नोंदवता येईल.

हेल्पलाइन क्रमांक: 8275330101

ई-मेल: rto.12-mh@gov.in 

वाहनचालकांसाठी महत्त्वाच्या सूचना

आरटीओने रस्ते सुरक्षेच्या दृष्टीने काही सूचना दिल्या आहेत.

वाहन चालवताना मोबाईलचा वापर टाळा

मद्यधुंद अवस्थेत वाहन चालवणे टाळा

वाहन रस्त्यावर अनधिकृत किंवा धोकादायक पद्धतीने पार्क करू नये

सर्व वैध कागदपत्रे नेहमी सोबत बाळगा 

नियमभंगाला नाही सहनशीलता, प्रवाशांचे हक्क आता सुरक्षित!

दिवाळीच्या गर्दीत आर्थिक शोषण रोखण्यासाठी आरटीओच्या या पावलाचं स्वागत केलं जात आहे. नागरिकांनीही सजग राहून अशा प्रकारांवर लक्ष ठेवावे आणि तक्रार करताना पुरावे सोबत द्यावेत. एकत्रित प्रयत्नांनीच प्रवास अधिक सुरक्षित आणि पारदर्शक होईल.