Pune Road Projects : नववर्षात पुणेकरांना दिलासा; जिल्ह्यातील दोन महत्त्वाच्या रस्ते प्रकल्पांचे काम यंदा सुरू होणार

Pune Road Projects : पुणे जिल्ह्यातील हडपसर–यवत सहापदरी उड्डाणपूल आणि तळेगाव–चाकण–शिक्रापूर महामार्ग या दोन मोठ्या रस्ते प्रकल्पांचे काम यंदा सुरू होणार आहे. या प्रकल्पांमुळे पुण्यातील वाहतूक कोंडी कमी होऊन प्रवास अधिक वेगवान होणार आहे.

Pune Road Projects : नववर्षाच्या सुरुवातीलाच पुणेकरांसाठी दिलासादायक बातमी समोर आली आहे. 2025 मध्ये मंजुरी मिळालेल्या पुणे जिल्ह्यातील दोन अत्यंत महत्त्वाच्या रस्ते प्रकल्पांवर यंदा प्रत्यक्ष काम सुरू होणार असल्याची माहिती मिळाली आहे. दीर्घकाळापासून वाहतूक कोंडीने त्रस्त असलेल्या नागरिकांसाठी हे प्रकल्प अत्यंत महत्त्वाचे ठरणार आहेत.

MSIDC कडून दोन मोठ्या रस्ते प्रकल्पांना गती

महाराष्ट्र राज्य पायाभूत सुविधा विकास महामंडळ (MSIDC) तर्फे पुणे जिल्ह्यातील दोन महत्त्वाच्या रस्ते प्रकल्प हाती घेण्यात आले आहेत. शहरातील आणि शहराबाहेरील वाहतूक अधिक वेगवान आणि सुरळीत करण्यासाठी या प्रकल्पांचे नियोजन करण्यात आले आहे.

हडपसर–यवत सहापदरी उड्डाणपूल प्रकल्प

नागपूर येथे झालेल्या हिवाळी अधिवेशनात मुख्यमंत्री देवेंद्र फडणवीस यांनी हडपसर–यवत मार्गाच्या वाढीला मंजुरी दिली होती. या प्रकल्पाअंतर्गत हडपसरमधील भैरोबा नाळा ते यवत दरम्यान सहापदरी उड्डाणपूल उभारण्यात येणार आहे. पुणे–सोलापूर महामार्गावरील वाहतूक कोंडी कमी करण्यासाठी हा प्रकल्प महत्त्वाचा ठरणार आहे. या प्रकल्पासाठी सुरुवातीला 5,262 कोटी रुपयांचा खर्च मंजूर करण्यात आला होता. जून 2025 मध्ये प्रकल्पाच्या वाढीला मंजुरी मिळाल्याने उड्डाणपुलाची लांबी सुमारे 4.5 किलोमीटरने वाढणार आहे.

तळेगाव–चाकण–शिक्रापूर महामार्गालाही हिरवा कंदील

तळेगाव–चाकण–शिक्रापूर महामार्गाच्या बांधकामालाही याच वर्षात सुरुवात होणार आहे. राष्ट्रीय महामार्ग क्रमांक 548 डी असलेला हा मार्ग पुणे शहर, औद्योगिक क्षेत्र आणि मालवाहतुकीसाठी अत्यंत महत्त्वाचा आहे. या महामार्गाचे काम दोन टप्प्यांत करण्यात येणार असून, एकूण 53.2 किलोमीटर लांबीच्या मार्गापैकी 24.2 किलोमीटरचा भाग उन्नत (Elevated) मार्ग असणार आहे.

निविदा प्रक्रियेच्या अंतिम टप्प्यात प्रकल्प

या दोन्ही रस्ते प्रकल्पांना गेल्या वर्षी मंजुरी मिळाली असून सध्या निविदा प्रक्रिया अंतिम टप्प्यात आहे. संबंधित प्रस्ताव राज्य सरकारकडे अंतिम मंजुरीसाठी पाठवण्यात आले आहेत. मंजुरी मिळताच प्रत्यक्ष कामाला सुरुवात केली जाणार आहे.

पुढील दोन महिन्यांत कामाला सुरुवात होण्याची शक्यता

MSIDC कडून दोन्ही प्रकल्पांचे नियोजन पूर्ण झाले असून येत्या दोन महिन्यांत या रस्त्यांच्या कामाला सुरुवात होण्याची शक्यता आहे. या दोन्ही प्रकल्पांचे कंत्राट मोंटेकार्लो लिमिटेड या कंपनीला देण्यात आले आहे.