Pune Railway Station Crowd Control: पुणे रेल्वे स्थानकावर 'गर्दी' मॅनेजमेंटचा नवा पॅटर्न! होळीला गावी जाताय? मग हे वाचाच...

Pune Railway Station Crowd Control: होळीच्या गर्दीला सामोरे जाण्यासाठी पुणे रेल्वे प्रशासनाने 'झिरो रिस्क' प्लॅन अंतर्गत एक 'होल्डिंग एरिया' तयार केला. चेंगराचेंगरी टाळण्यासाठी, लांब पल्ल्याच्या गाड्यांच्या प्रवाशांना थेट प्लॅटफॉर्मवर प्रवेश न देता. 

पुणे रेल्वे स्थानकावर 'गर्दी' मॅनेजमेंटचा नवा पॅटर्न!

पुणे : होळीचा सण म्हणजे आनंदाचा उत्साह, पण रेल्वे प्रवाशांसाठी मात्र हा काळ गर्दीच्या संघर्षाचा असतो. उत्तर भारतासह इतर राज्यांत जाणाऱ्या प्रवाशांची होणारी तुफान गर्दी लक्षात घेऊन पुणे रेल्वे प्रशासनाने यंदा 'झिरो रिस्क' प्लॅन तयार केला आहे. रेल्वे स्थानकावर होणारी चेंगराचेंगरी टाळण्यासाठी प्रशासनाने काही महत्त्वाचे बदल केले असून, प्रवाशांना आता एका विशेष सुविधेतून जावे लागणार आहे. 

काय आहे रेल्वेचा 'अ‍ॅक्शन प्लॅन'?

वाढत्या गर्दीमुळे स्थानकावर कोणताही अनर्थ घडू नये, यासाठी प्रशासनाने 'होल्डिंग एरिया' ही संकल्पना राबवली आहे.

कुठे आहे ही व्यवस्था? स्थानकाच्या मुख्य प्लॅटफॉर्मलगत असलेल्या पार्सल विभागा शेजारी हा प्रशस्त होल्डिंग एरिया उभारण्यात आला आहे.

कोणासाठी? प्रामुख्याने उत्तर भारत आणि इतर लांब पल्ल्याच्या विशेष गाड्यांनी प्रवास करणाऱ्या प्रवाशांना थेट प्लॅटफॉर्मवर न सोडता, आधी या एरियात थांबवले जाईल.

का? प्लॅटफॉर्मवर होणारी गर्दी नियंत्रित करणे आणि चेंगराचेंगरीसारखे प्रकार रोखणे हा यामागचा मुख्य उद्देश आहे.

प्रवाशांना मिळणाऱ्या हायटेक सुविधा

प्रवाशांना ताटकळत उभे राहावे लागू नये, यासाठी या होल्डिंग एरियात सर्व सोयी पुरवण्यात आल्या आहेत.

बसण्याची सोय व शेड: ऊन आणि पावसापासून संरक्षणासाठी मजबूत शेड आणि बसण्यासाठी आसनव्यवस्था.

डिजिटल अपडेट्स: तुमची ट्रेन किती वाजता येणार याची माहिती देण्यासाठी मोठे इलेक्ट्रॉनिक डिस्प्ले बोर्ड.

इतर सोयी: मोबाईल चार्जिंग पॉईंट्स, पिण्याचे शुद्ध पाणी, फिरते शौचालय आणि पंख्यांची व्यवस्था.

सुरक्षा कवच: आरपीएफ (RPF) जवानांचा कडक बंदोबस्त आणि मदतीसाठी नोडल अधिकाऱ्यांची नियुक्ती.

धडा घेतला जुन्या घटनेतून!

काही वर्षांपूर्वी गर्दीमुळे गुदमरून प्रवाशाचा मृत्यू झाल्याची दुर्दैवी घटना घडली होती. तो इतिहास पुन्हा घडू नये, यासाठी रेल्वे प्रशासन आता अधिक सतर्क झाले आहे. केवळ होळीच नाही, तर आगामी दिवाळी, दसरा आणि छठपूजेसाठीही हीच नियमावली लागू राहणार असल्याचे संकेत मिळाले आहेत. 

प्रवाशांना आवाहन

स्थानकावर गोंधळ टाळण्यासाठी रेल्वे कर्मचारी आणि सुरक्षा रक्षक करत असलेल्या सूचनांचे पालन करा.