Pune Municipal Election : पुण्यातील 22 माजी नगरसेवकांचा भाजपमध्ये प्रवेश; पठारे कुटुंबाची भूमिका ठरणार चर्चेचा विषय

Pune Municipal Election : पुण्यातील काँग्रेस, राष्ट्रवादी काँग्रेससह विविध पक्षांतील २२ माजी नगरसेवक आज भाजपमध्ये प्रवेश करणार आहेत. सुरेंद्र पठारे यांच्या प्रवेशामुळे राजकीय समीकरणे बदलण्याची शक्यता आहे. 

Pune Municipal Election : महापालिका निवडणुकांच्या पार्श्वभूमीवर पुण्यातील राजकीय हालचालींना वेग आला असून काँग्रेस, राष्ट्रवादी काँग्रेससह विविध पक्षांतील २२ माजी नगरसेवक व पदाधिकारी आज, रविवारी भारतीय जनता पक्षात प्रवेश करणार आहेत. मुंबईतील भाजप कार्यालयात होणाऱ्या या पक्षप्रवेशामुळे पुणे शहराच्या राजकारणात मोठी उलथापालथ होण्याची शक्यता वर्तवली जात आहे.

२२ माजी नगरसेवकांचा भाजपमध्ये प्रवेश

राष्ट्रवादी काँग्रेस शरदचंद्र पवार पक्षाचे वडगाव शेरी विधानसभा मतदारसंघाचे आमदार बापू पठारे यांचे चिरंजीव सुरेंद्र पठारे, माजी नगरसेवक विकास दांगट, बाळा धनकवडे, माजी नगरसेविका सायली वांजळे, रोहिणी चिमटे, तसेच राष्ट्रवादी काँग्रेसचे शहर उपाध्यक्ष नारायण गलांडे यांच्यासह एकूण २२ माजी नगरसेवक आणि पदाधिकारी भाजपमध्ये प्रवेश करणार आहेत. प्रदेशाध्यक्ष रवींद्र चव्हाण यांच्या उपस्थितीत मुंबईतील भाजप कार्यालयात सकाळी साडेदहा वाजता हा कार्यक्रम पार पडणार आहे.

पुण्यातील अनेक मतदारसंघांवर लक्ष

खडकवासला, हडपसर, वडगाव शेरी, पर्वती आणि शिवाजीनगर विधानसभा मतदारसंघांतील हे माजी नगरसेवक व पदाधिकारी पक्षप्रवेश करत असून, महापालिका निवडणुकीच्या दृष्टीने भाजप आपली ताकद वाढवत असल्याचे स्पष्ट संकेत मिळत आहेत. पुण्यातील भाजपचे प्रमुख नेतेही या कार्यक्रमाला उपस्थित राहणार आहेत.

भाजपमध्ये प्रवेशासाठी इच्छुकांची गर्दी

महापालिका निवडणुकीत विजयाची खात्री वाटत असल्याने इतर पक्षांतील अनेक नेते भाजपमध्ये प्रवेशासाठी उत्सुक असल्याचे चित्र आहे. केंद्रीय मंत्री मुरलीधर मोहोळ आणि उच्च व तंत्र शिक्षणमंत्री चंद्रकांत पाटील यांच्या भेटीसाठी इच्छुक नेत्यांच्या रांगा लागल्याचे दिसून आले. शुक्रवारी मोहोळ यांनी इच्छुकांना वेळ दिल्यानंतर त्यांच्या कार्यालयात दिवसभर गर्दी झाली होती.

सुरेंद्र पठारे यांच्या प्रवेशामागील कारणे

सुरेंद्र पठारे यांचा भाजप प्रवेश विशेष चर्चेचा विषय ठरत आहे. यापूर्वी बापू पठारे यांनी भाजपमधून उमेदवारी न मिळाल्याने राष्ट्रवादी काँग्रेसमध्ये प्रवेश करून विधानसभा निवडणूक लढवली होती. मात्र, लोकसभा निवडणुकीत त्यांनी भाजप उमेदवार मुरलीधर मोहोळ यांचा प्रचार केला होता. त्यामुळे पठारे कुटुंबाची भाजपशी जवळीक कायम राहिली आहे. मुख्यमंत्री देवेंद्र फडणवीस यांच्या सूचनेनुसार सुरेंद्र पठारे भाजपमध्ये प्रवेश करत असल्याची चर्चा असून, आमदार बापू पठारे मात्र राष्ट्रवादी काँग्रेसमध्येच राहणार असल्याचे स्पष्ट करण्यात आले आहे.