Pune : मुळा-मुठा नदीच्या पाण्याच्या पातळीत वाढ झाल्याने स्थानिक चिंतेत, पुरस्थितीमुळे नदीकाठच्या विकास कामांना धरले जबाबदार

पुण्यातील मुळा-मुठा नदीच्या पाण्याच्या पातळीत वाढ झाल्याने बोट क्लब आणि नॉर्थ मेन रोडवरील अनेक गृहनिर्माण सोसायट्यांमधील रहिवाशांनी चिंता व्यक्त केली आहे. रिव्हरफ्रंट डेव्हलपमेंटमुळे नदीच्या पाण्याच्या पातळीत वाढ होत असल्याचे स्थानिकांचे म्हणणे आहे.

मुंबई : पुण्यात गेल्या काही दिवसांपासून मुसळधार पावसाची स्थिती निर्माण झाली. अशातच अतिमुसळधार पावसामुळे मुळा-मुठा नदीच्या पाण्याच्या पातळीत वाढ झाली. यामुळे बोट क्लब रोड आणि नॉर्थ मेन रोडवरील अनेक गृहनिर्माण सोसायट्यांमधील रहिवासी नदीच्या वाढत्या पातळीमुळे चिंतेत आहेत. रहिवाशांचे म्हणणे आहे की रिव्हरफ्रंट डेव्हलपमेंट (आरएफडी) प्रकल्पामुळे नदीचे नैसर्गिक वहन कमी झाले असून, पाणी नेहमीपेक्षा जास्त वाढत आहे.

अतिमुसळधार पावसामुळे पूरस्थितीची भीती

"२-३ दिवसांचा सतत पाऊस पडल्यावर संगमवाडी ते मुंढवा दरम्यान नदीची पातळी लक्षणीयरीत्या वाढली आहे. आरएफडी बंधाऱ्याचा मोठा भाग पाण्याखाली गेला आहे. जर धरणांमधून अजून पाणी सोडले गेले, तर आमच्या सोसायट्यांमध्ये पाणी शिरेल," असे बोट क्लब रोडवरील रहिवासी रोडा मेहता यांनी सांगितले. तर १९ ऑगस्टच्या रात्री तर काही गृहनिर्माण सोसायट्यांच्या आवारात पाणी शिरले, कुंपण उखडले आणि पार्किंगमध्ये तसेच बागांमध्ये पाणी साचले. नागरी अधिकाऱ्यांच्या उदासीन वृत्तीमुळे रहिवासी असहाय्य वाटत आहेत.

स्मशानभूमी व आसपासच्या भागावर परिणाम

२० ऑगस्ट रोजी नदीची पातळी वाढल्यामुळे कोरेगाव पार्क रोडवरील नव्या सांडपाणी प्रक्रिया प्रकल्पाजवळील स्मशानभूमी अंशतः पाण्याखाली गेली. कल्याणीनगरचे रहिवासी सतीश प्रधान म्हणाले, "प्रत्येक वेळी पाणी वाढले की तात्पुरता बंधारा वाहून जातो आणि नंतर पुन्हा त्याच ठिकाणी बांधला जातो. हा करदात्यांच्या पैशांचा अपव्यय आहे. आरएफडीच्या कामामुळे नदीची रुंदी कमी झाली असून मुसळधार पावसात आणि धरणातून पाणी सोडले की पूरस्थिती निर्माण होते."

वारंवार वाढणाऱ्या पाण्याची समस्या

नॉर्थ मेन रोडवरील लिबर्टी हाऊसिंग सोसायटीच्या रहिवासी नीलिमा लवाना यांनी सांगितले, "पूर्वी दरवर्षी २-३ वेळा सोसायटीमध्ये पाणी शिरायचं. पण आरएफडीनंतर ही वारंवारता ६-७ वेळा वाढली आहे."

पर्यावरणवाद्यांच्या इशाऱ्याकडे दुर्लक्ष

पर्यावरणवादी आणि तज्ञांनी आधीच इशारा दिला होता की आरएफडी प्रकल्पामुळे नदीचा नैसर्गिक प्रवाह बदलणार आणि पर्यावरणावर दुष्परिणाम होणार. याशिवाय नदीसाठी काम करणाऱ्या शहरी संस्थेच्या संस्थापक शैलजा देशपांडे यांनी सांगितले, "आरएफडी बंधारे नदीच्या काठापलीकडे करायला हवे होते. पण प्रत्यक्षात अतिक्रमण केले गेले. परिणामी नदीची पातळी वाढते आहे. यावर उपाय म्हणून नदीचा ओव्हरफ्लो शोषण्यासाठी बफर झोन आणि ओल्या जमिनींची मालिका तयार करणे गरजेचे आहे."

PMC ची प्रतिक्रिया

आरएफडी प्रकल्पाचे प्रभारी PMC चे कार्यकारी अभियंता बिपिन शिंदे म्हणाले, "या पट्ट्यांचे काम अजूनही सुरू आहे. काम पूर्ण झाल्यावर समस्या सुटतील. उदाहरणार्थ, ताडीवाला झोपडपट्टी भागात परिस्थिती सुधारली आहे. स्मशानभूमीबाबतचे काम पावसाळ्यानंतर पुन्हा सुरू होईल. तसेच जळत्या घाटाजवळील झाडतोडीच्या परवानगीसाठी आम्ही प्रतीक्षा करत आहोत."