Pune Metro New Rules 2026: पुणेकर प्रवाशांनो लक्ष द्या! उद्यापासून मेट्रोच्या प्रवासात मोठा बदल; AFC गेट्सबाबत नवा नियम लागू!

Pune Metro New Rules 2026: पुणे मेट्रोने ३ मार्च २०२६ पासून AFC गेट्सच्या कार्यपद्धतीत महत्त्वपूर्ण बदल केला असून, आता तिकीट स्कॅन केल्यावरच गेट उघडतील. यासोबतच, धुलिवंदनानिमित्त मेट्रो सेवा सकाळी ६ ते दुपारी ३ वाजेपर्यंत बंद राहणार आहे.

पुणेकर प्रवाशांनो लक्ष द्या! उद्यापासून मेट्रोच्या प्रवासात मोठा बदल

पुणे : पुणे मेट्रोने प्रवास करणाऱ्या नागरिकांसाठी एक महत्त्वाची सूचना आहे. उद्यापासून म्हणजेच ३ मार्च २०२६ पासून मेट्रो स्थानकांवरील तिकीट तपासणीच्या (AFC) गेट्सच्या कार्यपद्धतीत महत्त्वपूर्ण बदल करण्यात येत आहे. प्रवाशांनी गोंधळून जाऊ नये यासाठी हा बदल समजून घेणे आवश्यक आहे. 

नेमकं काय बदलणार?

आतापर्यंत पुणे मेट्रोच्या स्थानकांवर तुम्ही प्रवेश करताना किंवा बाहेर पडताना हे 'ऑटोमॅटिक फेअर कलेक्शन' (AFC) गेट्स कायम उघडे असायचे. जेव्हा एखादा प्रवासी चुकीचे तिकीट वापरायचा, तेव्हाच हे गेट्स बंद व्हायचे. मात्र, उद्यापासून ही पद्धत पूर्णपणे बदलणार आहे.

नेहमी बंद राहतील गेट्स: आता मेट्रो स्टेशनवरील हे गेट्स आधीपासूनच 'बंद' स्थितीत असतील.

स्कॅन केल्यावरच प्रवेश: जेव्हा प्रवासी आपले तिकीट, क्यूआर कोड किंवा मेट्रो कार्ड मशीनवर स्कॅन करतील, तेव्हाच हे गेट्स उघडतील.

शिस्तबद्ध प्रवास: प्रवाशांना अधिक शिस्त लावण्यासाठी आणि विनातिकीट प्रवासाला आळा घालण्यासाठी पुणे मेट्रोने हा जागतिक दर्जाचा बदल स्वीकारला आहे. 

धुलिवंदनानिमित्त मेट्रोच्या वेळेत बदल!

उद्या दि. ३ मार्च रोजी धुलिवंदनाचा सण असल्याने मेट्रोच्या वेळापत्रकातही बदल करण्यात आला आहे. प्रवाशांनी आपल्या प्रवासाचे नियोजन खालीलप्रमाणे करावे.

सकाळी ६ ते दुपारी ३ वाजेपर्यंत: मेट्रो सेवा पूर्णपणे बंद असेल.

दुपारी ३ ते रात्री ११ वाजेपर्यंत: मेट्रो सेवा नियमितपणे सुरू राहील.

तिकीट स्कॅन केल्याशिवाय गेट उघडणार नाही

पुणे मेट्रो रेलने आपल्या अधिकृत 'X' (ट्विटर) अकाऊंटवरून या दोन्ही बदलांची माहिती दिली आहे. त्यामुळे उद्या दुपारी ३ नंतर मेट्रोने प्रवास करताना तिकीट स्कॅन केल्याशिवाय गेट उघडणार नाही, याची प्रवाशांनी नोंद घ्यावी.