Pune Cab Dispute : पुण्यात आयटी तरुणीचा ३०० रुपये कॅब भाडं देण्यास नकार, ड्रायव्हरला दिली पोलिसांची धमकी

पुण्यात एका आयटी तरुणीने ३०० रुपये कॅब भाडं देण्यास नकार दिला. कुटुंबाला पोसण्यासाठी हे पैसे हवेत, अशी विनवणी कॅब ड्रायव्हरने केली. हिंजवडी आयटी पार्कमधील या वादाचा व्हिडिओ सध्या व्हायरल होत आहे.

मुंबई : पुण्यातील हिंजवडी आयटी पार्क फेज ३ मधील एक व्हिडिओ सध्या सोशल मीडियावर चर्चेत आहे. एका आयटी तरुणीने कॅबचं भाडं देण्यास नकार दिल्याने हा वाद सुरू झाला. या व्हिडिओवर लोक वेगवेगळ्या प्रतिक्रिया देत आहेत.

कॅब ड्रायव्हरने तरुणीला तिच्या ठिकाणी सोडल्यानंतर ३०० रुपये भाडं मागितलं. पण तिने पैसे देण्यास नकार दिला. ड्रायव्हरने जाब विचारल्यावर तिने थेट पोलिसांना बोलावण्याची धमकी दिली. एवढंच नाही तर, माझ्याकडे १० लाखांची गाडी आहे, असा रुबाबही तिने या वादात दाखवला.

ड्रायव्हरने तिला स्पष्ट सांगितलं की तो ३०० रुपये सोडू शकत नाही, कारण त्याला हे पैसे घरी कुटुंबासाठी न्यायचे आहेत. यानंतर हा वाद आणखीच वाढला.

या व्हिडिओमुळे सोशल मीडियावर एक नवी चर्चा सुरू झाली आहे. कष्टकरी ड्रायव्हर्सचा सन्मान आणि वापरलेल्या सेवेचे पैसे देणं किती महत्त्वाचं आहे, यावर लोक बोलत आहेत. ड्रायव्हरच्या कमाईवर त्याचं घर चालतं, हे विसरून चालणार नाही, असं म्हणत नेटकऱ्यांनी या तरुणीवर टीका केली आहे.

या घटनेमुळे कॅब ड्रायव्हर आणि प्रवासी यांच्यात रोज होणाऱ्या वादाचा मुद्दा पुन्हा समोर आला आहे. अशा व्यवहारांमध्ये एकमेकांचा आदर राखणं गरजेचं आहे. ड्रायव्हरसाठी हे पैसे म्हणजे चिल्लर नसून त्यांच्या कुटुंबाचा उदरनिर्वाह चालवणारं उत्पन्न असतं.

या व्हिडिओतील तरुणी आणि कॅब ड्रायव्हर यांची ओळख अद्याप समोर आलेली नाही. तसेच, या प्रकरणी पोलिसांत कोणतीही तक्रार दाखल झाली आहे की नाही, हेही अद्याप स्पष्ट झालेलं नाही.