गणेशोत्सवावेळी पीओपी मुर्ती विसर्जनासाठी नवे धोरण लागू होणार, मुंबईतील प्रसिद्ध मंडळांबद्दलही घेतला निर्णय

गणेशोत्सवावेळी पीओपीच्या गणपतीच्या मुर्तींच्या विसर्जनाबद्दल राज्य सरकारकडून नवे धोरण लवकरच जाहीर केले जाणार आहेत. याकडे मुंबईतील काही मोठ्या आणि प्रसिद्ध मंडळाचे लक्ष लागून राहिले आहे.

Mumbai : मुंबईसह राज्यातील गणेशोत्सव मंडळांसाठी मोठी बातमी समोर आली आहे. प्लास्टर ऑफ पॅरिस (POP) गणेशमूर्तींच्या विसर्जनासाठी फडणवीस सरकार नवीन धोरण आणण्याच्या तयारीत आहे. या आठवड्यात शासनाकडून मूर्ती विसर्जनासाठी नवे धोरण जाहीर होण्याची शक्यता आहे. त्यामुळे लालबागचा राजा, मुंबईचा राजा यांसारख्या प्रतिष्ठित मंडळांसह अनेक गणेश मंडळांचे याकडे लक्ष लागले आहे.

मुंबई उच्च न्यायालयाने नुकताच पीओपी मूर्तींवरील बंदी उठवण्याचा निर्णय दिला असून, मूर्तिकार आणि गणेश मंडळांमध्ये यामुळे आनंदाचे वातावरण आहे. याच पार्श्वभूमीवर सरकार मूर्ती विसर्जनासाठी नव्या धोरणावर काम करत आहे.

धोरणात कोणाला मिळणार दिलासा?

सूत्रांच्या माहितीनुसार, उंच POP मूर्तीची प्राणप्रतिष्ठा मंडळांना करता येणार असून, धोरणात लालबागचा राजा आणि मुंबईचा राजा यांसारख्या मंडळांना विशेष सवलती दिल्या जाणार आहेत.

न्यायालयाचे स्पष्ट निर्देश

मुंबई उच्च न्यायालयाने POP मूर्ती बनवण्यास आणि विक्रीस परवानगी दिली असली तरी, नैसर्गिक जलस्रोतांमध्ये त्यांचे विसर्जन करण्यास पूर्णतः मनाई केली आहे. अशा मूर्तींचे विसर्जन केवळ कृत्रिम तलावांमध्येच करावे लागेल. तसेच, सरकारने तीन आठवड्यांत एक समिती नेमून सविस्तर उपाययोजना सादर कराव्यात, असे निर्देशही कोर्टाने दिले आहेत.

काय घडलं न्यायालयात?

• नैसर्गिक जलस्रोतांमध्ये POP मूर्ती विसर्जनास मनाई.
• केवळ कृत्रिम तलावातच मूर्ती विसर्जनाला परवानगी.
• मोठ्या उंचीच्या मूर्तींच्या संदर्भात मंडळांना दरवर्षी एकच मूर्ती वापरण्याचा पर्याय विचारात.
• राज्य सरकारने या पार्श्वभूमीवर मूर्तिकार, मंडळे आणि पर्यावरण यांचा समतोल राखणारे धोरण तयार करावे.

या निर्णयामुळे घरगुती गणपतीसाठी तसेच सार्वजनिक मंडळांसाठी POP मूर्ती बनवण्यास अडथळा उरलेला नाही. मात्र, पर्यावरणपूरक विसर्जनाच्या अटींवर कटाक्षाने पालन करणे बंधनकारक असेल. मूर्तिकारांसाठी ही मोठा दिलासा देणारी वेळ आहे.

(राहा अपडेट, राहा जगाच्या पुढे. सातत्याने अपडेट होणाऱ्या आमच्या फेसबुक आणि एक्स (ट्विटर) पेजला सबक्राईब करुन ताज्या घडामोडी जाणून घ्या.)

आमच्या एशियानेट न्यूज मराठीच्या फेसबुक पेजला सबस्क्राईब करा. त्यासाठी येथे क्लिक करा.

आमच्या एशियानेट न्यूज मराठीच्या एक्स (ट्विटर) पेजला सबस्क्राईब करा. त्यासाठी येथे क्लिक करा.