
पुणे: वादग्रस्त आणि बडतर्फ झालेली IAS प्रशिक्षणार्थी पूजा खेडकर पुन्हा एकदा वादाच्या भोवऱ्यात अडकली आहे. यावेळी प्रकरण आणखीनच गंभीर आहे. नवी मुंबईतील एका ट्रक ड्रायव्हरच्या अपहरणात खेडकर कुटुंबाचं नाव समोर आलं आहे.
13 सप्टेंबर रोजी, प्रल्हाद कुमार नावाचा ट्रक ड्रायव्हर मुलुंड ते ऐरोली रोडवर मिक्सर ट्रक चालवत असताना, त्याचा ट्रक एका कारला हलकासा धडकला. त्या कारचा नंबर होता MH 12 RT 5000. या किरकोळ अपघातावरून वाद झाला आणि कारमधील दोघांनी ड्रायव्हरला गाडीत बसवून जबरदस्तीने पळवून नेलं.
पोलिसांनी सखोल तपास केला असता, संबंधित कार पूजा खेडकरच्या घरात आढळून आली. नंतर, पोलीस नवी मुंबईतल्या खेडकरांच्या बंगल्यावर पोहोचले आणि तिथेच अपहरण झालेला ड्रायव्हर सापडला! पण पोलिसांना घरात सहज प्रवेश मिळाला नाही. मनोरमा खेडकर (पूजाची आई) यांनी पोलिसांना दरवाजा उघडण्यास नकार दिला. परिणामी, पोलिसांनी गेट उडवून आत प्रवेश केला.
घरात प्रवेश करताना खेडकर कुटुंबीयांनी पोलिसांशी अरेरावी केली. मनोरमा खेडकर यांनी पोलिसांवर कुत्रा सोडल्याचा गंभीर आरोप करण्यात आला आहे. तसेच, त्यांनी पोलिसांना अडवून सरकारी कामात अडथळा निर्माण केला. त्यामुळे त्यांच्यावर कायदेशीर कारवाईची शक्यता आहे.
पोलिसांनी खेडकरांच्या बंगल्यात तब्बल दोन तास तपासणी केली. तपासादरम्यान पूजा खेडकरचा मोबाईल जप्त करण्यात आला. घरात उपस्थित केअरटेकरला ताब्यात घेण्यात आलं. दोन जेवणाचे डबे आढळले, जे कुणाच्या उपस्थितीचा पुरावा मानला जात आहे.
पूजा खेडकर आणि तिचे वडील दिलीप खेडकर सध्या फरार असून, पोलिसांकडून त्यांचा शोध सुरु आहे. मनोरमा खेडकर यांनी पोलीस ठाण्यात हजर होण्याचं आश्वासन दिलं होतं, मात्र त्या देखील गायब झाल्या आहेत.
नवी मुंबई पोलिसांनी या प्रकरणाची गंभीर दखल घेतली असून अपहरण, अरेरावी आणि सरकारी कामात अडथळा अशा अनेक कलमांअंतर्गत गुन्हे दाखल होण्याची शक्यता आहे. लवकरच या प्रकरणात आणखी खुलासे होण्याची शक्यता आहे.
IAS अधिकारी होण्याचे स्वप्न बघणारी पूजा खेडकर सध्या पोलिसांच्या रडारवर आहे. एकीकडे बडतर्फी आणि दुसरीकडे गुन्हेगारी प्रकरणं हे सर्व पाहता तिचं करिअर धोक्यात आलं आहे. अपहरणासारख्या गंभीर प्रकरणात तिच्या कुटुंबाचा सहभाग समोर येणे ही चिंता वाढवणारी बाब आहे.