वडगाव मावळमध्ये चारित्र्याच्या संशयाचा क्रूर शेवट!, पतीने पत्नीचा दगडाने ठेचून केला खून

कोंडिवडे गावात पतीने चारित्र्यावर संशय घेत पत्नीचा दगडाने ठेचून खून केला. मृत महिलेचे नाव सोनाबाई वाघमारे असून आरोपी पती अशोक वाघमारे याला अटक करण्यात आली आहे. घटनेनंतर परिसरात हादरवून गेला आहे.

वडगाव मावळ, पुणे: आंदर मावळातील कोंडिवडे गावात शुक्रवारच्या सकाळी घडलेली एक हृदयद्रावक घटना संपूर्ण परिसराला हादरवून गेली. चारित्र्यावर संशय घेत पतीने पत्नीचा दगडाने ठेचून निर्घृण खून केल्याची धक्कादायक बाब उघडकीस आली आहे. मृत महिलेचे नाव सोनाबाई अशोक वाघमारे (वय ३३) असून, आरोपी पतीचे नाव अशोक बारकू वाघमारे (रा. कातकरी वस्ती, कोंडिवडे, ता. मावळ) आहे. या प्रकरणी वडगाव मावळ पोलीस ठाण्यात गुन्हा दाखल करण्यात आला असून, पोलिसांनी आरोपीला अटक केली आहे.

मासेमारीसाठी बाहेर पडले आणि मृत्यूच्या दारात नेले

पोलिसांच्या प्राथमिक तपासानुसार, शुक्रवारी सकाळी ७ वाजता अशोक वाघमारे आपल्या पत्नीसोबत मासेमारीसाठी बाहेर गेला होता. मात्र या वेळी त्याच्या मनात पत्नीच्या चारित्र्यावर संशय होता. त्या क्षणी दोघांमध्ये वाद झाला आणि रागाच्या भरात पतीने पत्नीच्या डोक्यावर व कपाळावर दगडाने वार करत तिचा जीव घेतला.

घरगुती वादाचे टोकाचे रूप

पोलिस निरीक्षक कुमार कदम यांच्या माहितीनुसार, आरोपी पत्नीवर सातत्याने संशय घेत असे, तिला शिवीगाळ आणि मारहाण करणे हे नित्याचे झाले होते. हेच वैमनस्य अखेर प्राणघातकी ठरले. अशोक वाघमारेने पत्नीवर दगडफेक करत ती जागीच ठार केली.

मुलीच्या वडिलांची फिर्याद, पुढील तपास सुरू

सोनाबाई यांच्या वडिलांनी वडगाव मावळ पोलीस ठाण्यात तक्रार दाखल केली आहे. या खूनप्रकरणाचा तपास सहायक पोलीस निरीक्षक शीतल कुमार डोईजड करत आहेत. पोलिसांकडून अधिक तपास सुरू आहे.

संशयाचे सावट खरोखरीच एवढं घातक?

ही घटना केवळ एका कुटुंबातील दुर्दैवी प्रसंग नाही, तर समाजातील स्त्रीविरोधी मानसिकतेचे भीषण उदाहरण आहे. संशयाच्या वावटळीत भरडल्या जाणाऱ्या स्त्रियांच्या सुरक्षेचा मुद्दा पुन्हा एकदा ऐरणीवर आला आहे.