नाशिकमध्ये जम्बो पोलीस भरतीचा बिगुल वाजला! 'या' तारखेपासून सुरू होतेय मैदानी चाचणी; उमेदवारांसाठी मोठी संधी

Nashik Police recruitment 2026: आगामी सिंहस्थ कुंभमेळ्याच्या पार्श्वभूमीवर नाशिक ग्रामीण पोलीस दलात ३८० रिक्त पदांसाठी भरती प्रक्रिया जाहीर झाली. यामध्ये पोलीस शिपाई, कारागृह पोलीस, चालक पदांचा समावेश आहे. 

नाशिकमध्ये जम्बो पोलीस भरतीचा बिगुल वाजला!

नाशिक : नाशिकच्या तरुणांसाठी खाकी वर्दी परिधान करण्याची सुवर्णसंधी चालून आली आहे. आगामी सिंहस्थ कुंभमेळ्याच्या पार्श्वभूमीवर नाशिक ग्रामीण पोलीस दलात रिक्त पदांसाठी भरती प्रक्रिया जाहीर झाली असून, पात्र उमेदवारांची फिजिकल टेस्ट (मैदानी चाचणी) लवकरच पार पडणार आहे.

भरतीचा तपशील, एकूण ३८० जागांसाठी रणसंग्राम

नाशिक ग्रामीण पोलीस अधीक्षक बाळासाहेब पाटील यांनी या भरतीची अधिकृत अधिसूचना जारी केली आहे. यामध्ये तीन प्रमुख विभागांचा समावेश आहे.

पोलीस शिपाई (ग्रामीण): २१० पदे

मध्यवर्ती कारागृह पोलीस शिपाई: ११८ पदे

पोलीस चालक (ड्रायव्हर): ५२ पदे

एकूण रिक्त जागा: ३८० 

मैदानी चाचणी कधी होणार?

मिळालेल्या माहितीनुसार, या रिक्त पदांसाठीची मैदानी चाचणी २० फेब्रुवारी (शुक्रवार) पासून सुरू होणार आहे. गेल्या अनेक महिन्यांपासून सरावात व्यस्त असलेल्या तरुण-तरुणींसाठी ही 'फायनल टेस्ट' असणार आहे. 

कुंभमेळ्यासाठी प्रशासनाची 'मेगा' तयारी

नाशिक आणि त्र्यंबकेश्वरमध्ये भरणाऱ्या सिंहस्थ कुंभमेळ्यासाठी जगभरातून करोडो भाविक येण्याची शक्यता आहे. या अथांग जनसागरावर नियंत्रण मिळवण्यासाठी आणि सुरक्षा व्यवस्था चोख ठेवण्यासाठी राज्य सरकारने या जम्बो भरतीचा निर्णय घेतला आहे. विशेष म्हणजे, २०२२ ते २०२५ दरम्यान वयोमर्यादा ओलांडलेल्या उमेदवारांना प्रशासनाने अखेरची संधी देऊन मोठा दिलासा दिला आहे. 

चाचणीमध्ये काय काय होणार?

भरती प्रक्रिया पारदर्शक व्हावी यासाठी दक्षता पथके तैनात करण्यात आली आहेत. उमेदवारांना खालील टप्प्यांतून जावे लागेल.

कागदपत्र पडताळणी (Document Verification)

शारीरिक मोजमाप (Body Checkup)

धावणे (Running)

गोळाफेक (Shot Put) 

महत्त्वाची सूचना

मैदानी चाचणीचे नेमके ठिकाण अद्याप गुलदस्त्यात असून, लवकरच ते अधिकृत संकेतस्थळावर जाहीर केले जाईल. उमेदवारांनी कोणत्याही अफवांवर विश्वास न ठेवता सराव सुरू ठेवावा.