नाशिक हादरले! भोंदूबाबा अशोक खरातने ५ 'नरबळी' घेतल्याचा संशय; कोर्टात धक्कादायक खुलासे, २९ मार्चपर्यंत कोठडी

Nashik Crime News: नाशिकचा स्वयंघोषित भोंदूबाबा अशोक खरात याला अटक झाली असून, त्याच्यावर ५ जणांचा नरबळी घेतल्याचा गंभीर संशय आहे. पोलिसांना त्याच्याकडून पिस्तूल, काडतुसे, प्राण्यांची कातडी आणि महिलांवरील अत्याचाराचे पुरावे सापडले आहेत. या प्रकरणी एसआयटी अधिक तपास करत असून, न्यायालयाने त्याला पोलीस कोठडी सुनावली आहे.

नाशिक: नाशिकचा स्वयंघोषित भोंदूबाबा अशोक खरात याच्या पापाचा घडा आता भरला असून, त्याच्या कृत्यांची व्याप्ती पाहून पोलीसही चक्रावून गेले आहेत. एसआयटीने (SIT) खरातला न्यायालयात हजर केले असता, सरकारी वकिलांनी मांडलेला युक्तिवाद ऐकून उपस्थित सुन्न झाले. खरातने केवळ फसवणूक किंवा अत्याचारच केले नाहीत, तर त्याने ५ जणांचा नरबळी घेतल्याचा प्रबळ संशय सरकारी वकिलांनी कोर्टात व्यक्त केला आहे.

५ गोळ्या 'मिसिंग' आणि नरबळीचा संशय

अशोक खरातच्या झडतीत पोलिसांना एक पिस्तूल सापडले आहे. धक्कादायक बाब म्हणजे, या पिस्तूलातून ५ गोळ्या झाडल्या गेल्याचे समोर आले आहे. या ५ गोळ्यांचा वापर त्याने नरबळी देण्यासाठी केला असावा, असा संशय पुराव्यांच्या आधारे व्यक्त करण्यात आला आहे.

सरकारी वकिलांचा कोर्टातील रोखठोक युक्तिवाद

अघोरी कृत्ये: खरातच्या फार्म हाऊसवर प्राण्यांची कातडी, पांढरी व काळी कस्तुरी आणि २१ जिवंत काडतुसे सापडली आहेत. त्याने हरणाची शिकार करून कस्तुरी मिळवली का? याचा तपास सुरू आहे.

अत्याचाराचे पुरावे: ६७ वर्षांचा आरोपी एका ३० वर्षीय महिलेवर अत्याचार करतानाचे व्हिडीओ रेकॉर्डिंग (DVR) पोलिसांच्या हाती लागले आहे. पीडित महिलांची संख्या दिवसेंदिवस वाढत आहे.

राजमुद्रा आणि संपत्ती: खरातच्या घरात बेकायदेशीररीत्या 'राजमुद्रा' आणि अनेक मालमत्तांची कागदपत्रे सापडली आहेत. संमोहनाच्या जाळ्यात ओढून त्याने शेकडो लोकांना आर्थिक गंडा घातला आहे.

अंधश्रद्धेचा बाजार: तो लोकांना मंत्रमुग्ध केलेले पाणी आणि खडे द्यायचा. हे साहित्य नेमके कुठून आणले जात होते, याचा शोध घेणे आवश्यक आहे.

बचाव पक्षाचा दावा

दुसरीकडे, आरोपीच्या वकिलांनी सर्व आरोप फेटाळले आहेत. "अशोक खरात केवळ पूजाविधी करत होते, कोणताही जादूटोना किंवा अघोरी कृत्य करत नव्हते," असा दावा त्यांनी केला. मात्र, पुराव्यांची गंभीरता लक्षात घेता न्यायालयाने खरातला २९ मार्चपर्यंत पोलीस कोठडी सुनावली आहे.

तपासाची दिशा

तपासाधिकारी किरण सूर्यवंशी यांच्या मार्गदर्शनाखाली पोलीस आता खरातच्या फार्म हाऊसवरील 'त्या' DVR मधील गुपिते उलगडणार आहेत. यातून आणखी किती महिलांची फसवणूक झाली आणि नरबळीच्या संशयात किती तथ्य आहे, हे स्पष्ट होईल.