Heart of India : भारताच्या अगदी मध्यभागी कोणतं शहर आहे माहितीये? महाराष्ट्रातील हे शहर आहे खूप खास

भारताचा नकाशा पाहिलात तर त्यात अनेक शहरं आणि राज्यं दिसतात. पण आपल्या देशाच्या अगदी मध्यभागी कोणतं शहर आहे, हे तुम्हाला माहितीये का? या शहराचं एक वेगळंच महत्त्व आहे. अगदी ब्रिटिशांच्या काळापासून या शहराला विशेष ओळख मिळाली आहे.

मध्यभागी असलेलं शहर कोणतं?

आपला भारत देश खूप मोठा आहे. उत्तरेला हिमालयापासून दक्षिणेला समुद्रकिनाऱ्यापर्यंत आणि पूर्वेकडून पश्चिमेपर्यंत आपला देश पसरला आहे. या एवढ्या मोठ्या देशाच्या अगदी मध्यभागी कोणतं शहर आहे, हे तुम्ही सांगू शकता का? ते दुसरं तिसरं कोणतंही शहर नसून महाराष्ट्रातील नागपूर आहे. भौगोलिकदृष्ट्या देशाच्या मध्यभागी असल्यामुळे नागपूरला एक वेगळी ओळख मिळाली आहे. या शहराबद्दल आणखी एक रंजक गोष्ट म्हणजे इथे ऐतिहासिक 'झिरो माईल स्टोन' आहे. ब्रिटिश अधिकारी देशातील वेगवेगळ्या ठिकाणांमधलं अंतर मोजण्यासाठी या जागेचा मुख्य केंद्र म्हणून वापर करायचे, असं इतिहास सांगतो.

झिरो माईल स्टोन म्हणजे काय?

नागपूरमधला 'झिरो माईल स्टोन' खूप खास आहे. हा वरवर पाहता एखाद्या सामान्य स्तंभासारखा दिसत असला, तरी त्याला एक मोठा इतिहास आहे. ब्रिटिश अधिकारी देशातील रस्ते आणि वेगवेगळ्या भागांमधलं अंतर मोजण्यासाठी या जागेला मुख्य केंद्र मानायचे. याच खुणेपासून इतर ठिकाणांचं अंतर मोजण्याची पद्धत तेव्हा होती. म्हणूनच नागपूरला "भारताच्या मध्यभागी असलेलं शहर" अशी पक्की ओळख मिळाली. या झिरो माईल स्टोनजवळ स्तंभासोबतच चार घोड्यांचे पुतळेही पाहायला मिळतात. हे पुतळे या जागेची ऐतिहासिक आठवण करून देतात.

देशाच्या मध्यभागी असल्याचा फायदा

नागपूरचं महत्त्व फक्त 'झिरो माईल स्टोन'पुरतं मर्यादित नाही. देशाच्या मध्यभागी असल्यामुळे वाहतुकीच्या दृष्टीनेही हे शहर एक अत्यंत महत्त्वाचं केंद्र बनलं आहे. रस्ते आणि रेल्वे मार्गांसोबतच विमान प्रवासासाठीही नागपूर हे एक प्रमुख ठिकाण आहे. देशातील वेगवेगळ्या भागांना जोडणाऱ्या शहरांमध्ये नागपूरचं स्थान खूप वरचं आहे. नागपूरमधला हा झिरो माईल स्टोन भारताच्या भौगोलिक इतिहासाशी जोडलेली एक अतिशय प्रसिद्ध खूण आहे.