Maharashtra Weather Alert: महाराष्ट्रात अवकाळीचा कडाका! १२ जिल्ह्यांना पावसाचा 'यलो अलर्ट'; उकाड्यातून सुटका की संकट?

Maharashtra Weather Alert: हवामान विभागाने महाराष्ट्रातील हवामानात मोठ्या बदलाचा अंदाज वर्तवला आहे. १७ मार्च रोजी विदर्भ आणि मराठवाड्यातील १२ जिल्ह्यांमध्ये विजांच्या कडकडाटासह अवकाळी पावसाचा 'यलो अलर्ट' जारी करण्यात आला आहे.

महाराष्ट्रात अवकाळीचा कडाका! १२ जिल्ह्यांना पावसाचा 'यलो अलर्ट'

पुणे: राज्याच्या हवामानात अचानक मोठी उलथापालथ सुरू झाली आहे. एकीकडे उन्हाचा चटका वाढत असतानाच, आता वरुणराजा हजेरी लावण्याच्या तयारीत आहे. हवामान विभागाने (IMD) १७ मार्च रोजी राज्याच्या विविध भागांत विजांच्या कडकडाटासह अवकाळी पावसाचा अंदाज वर्तवला असून तब्बल १२ जिल्ह्यांना यलो अलर्ट दिला आहे. 

विदर्भ आणि मराठवाड्याला पावसाचा इशारा

हवामान खात्यानुसार, विदर्भ आणि मराठवाड्यातील काही जिल्ह्यांमध्ये वादळी वाऱ्यासह पावसाची शक्यता आहे.

विदर्भ: नागपूर, यवतमाळ, वर्धा, चंद्रपूर, गडचिरोली, भंडारा आणि गोंदिया या जिल्ह्यांमध्ये विजांच्या कडकडाटासह हलका ते मध्यम पाऊस पडू शकतो.

मराठवाडा: नांदेड, बीड, लातूर आणि धाराशिव या जिल्ह्यांमध्ये पावसाचा यलो अलर्ट देण्यात आला आहे.

पश्चिम महाराष्ट्र: सोलापूर जिल्ह्यालाही वादळी वाऱ्यांचा इशारा देण्यात आला आहे. 

कोकण आणि मुंबई, घामाच्या धारा कायम

राज्यात कुठे पाऊस पडत असला, तरी कोकण पट्ट्यात मात्र उकाडा असह्य होणार आहे.

मुंबई व उपनगरे: कमाल तापमान ३२ ते ३६ अंशांपर्यंत जाईल. आर्द्रतेचे (Humidity) प्रमाण जास्त असल्याने मुंबईकर उकाड्याने हैराण होतील.

ठाणे, पालघर आणि रायगड: या भागातही उष्ण आणि दमट हवामान कायम राहील. 

उत्तर महाराष्ट्र आणि पुणे, तापमानात वाढ

पुणे व सातारा: पुण्यात तापमान ३६ अंशांपर्यंत जाण्याची शक्यता असून हवामान कोरडे राहील.

नाशिक, जळगाव: उत्तर महाराष्ट्रात तापमानाचा पारा चढताच राहणार असून उन्हाची तीव्रता अधिक जाणवेल. 

शेतकऱ्यांसाठी महत्त्वाची सूचना

१७ मार्च रोजी विजांच्या कडकडाटासह पाऊस होण्याची शक्यता असल्याने, काढणीला आलेल्या पिकांची योग्य काळजी घेण्याचे आवाहन करण्यात आले आहे. तसेच विजा चमकत असताना झाडाखाली किंवा मोकळ्या जागेत थांबणे टाळावे.