Maharashtra Weather Update: महाराष्ट्रात सूर्याचा पारा चढला, उद्या १४ जिल्ह्यांत उष्णतेचा 'यलो अलर्ट'; विदर्भात तापमान ४१ अंशांच्या पार?

Maharashtra Weather Update: मार्चच्या सुरुवातीलाच महाराष्ट्रात उन्हाळा तीव्र झाला असून, हवामान खात्याने १० मार्च रोजी १४ जिल्ह्यांसाठी उष्णतेचा 'यलो अलर्ट' जारी केला आहे. कोकण आणि विदर्भ पट्ट्यात तापमान ४१ अंशांपर्यंत पोहोचण्याची शक्यता आहे.

महाराष्ट्र्रात सूर्याचा पारा चढला

मुंबई: महाराष्ट्रात मार्च महिन्याच्या सुरुवातीलाच उन्हाळ्याने रौद्र रूप धारण करण्यास सुरुवात केली आहे. उद्या, १० मार्च रोजी राज्यातील हवामानात मोठे बदल होणार असून तब्बल १४ जिल्ह्यांना हवामान खात्याने (IMD) उष्णतेचा 'यलो अलर्ट' जारी केला आहे. विशेषतः विदर्भ आणि कोकण पट्ट्यात उकाड्याने नागरिक हैराण होण्याची शक्यता आहे. 

कोकण आणि मुंबई, घामाच्या धारा सुटणार!

मुंबईसह संपूर्ण कोकण किनारपट्टीवर आर्द्रता (Humidity) वाढल्याने उकाडा असह्य होणार आहे.

मुंबई, ठाणे, पालघर, रायगड आणि रत्नागिरी: या जिल्ह्यांना यलो अलर्ट देण्यात आला असून कमाल तापमान ३८ अंशांपर्यंत जाऊ शकते.

हवेतील ओलावा जास्त असल्याने प्रत्यक्षातील तापमानापेक्षा उन्हाचा चटका अधिक तीव्र जाणवेल. 

विदर्भ: राज्याची 'गरम भट्टी'

विदर्भात सूर्याचा कोप सर्वाधिक पाहायला मिळत आहे. नागपूर, अमरावती, अकोला या भागात पारा ३७ ते ४१ अंशांच्या दरम्यान राहण्याचा अंदाज आहे.

अमरावती, अकोला आणि वर्धा: या जिल्ह्यांमध्ये उष्णतेच्या लाटेसारखी स्थिती निर्माण होऊ शकते, त्यामुळे येथेही यलो अलर्ट जारी करण्यात आला आहे.

मराठवाडा आणि उत्तर महाराष्ट्र: कोरड्या उन्हाचा तडाखा

मराठवाडा

छत्रपती संभाजीनगर, जालना, बीड आणि परभणीमध्ये कोरड्या उन्हाचा तडाखा बसेल. येथील तापमान ३९ अंशांपर्यंत पोहोचण्याची शक्यता आहे.

उत्तर महाराष्ट्र

जळगाव आणि अहिल्यानगर (अहमदनगर) मध्येही उष्णतेचा यलो अलर्ट देण्यात आला असून दुपारी घराबाहेर पडणे जिकिरीचे ठरेल.

पश्चिम महाराष्ट्र: पुण्यातही चटका वाढणार

पुणे, सातारा आणि कोल्हापूर परिसरात हवामान मुख्यत्वे कोरडे राहील. पुण्यात कमाल तापमान ३८ अंशांच्या आसपास राहण्याची शक्यता असल्याने दुपारच्या वेळी नागरिकांनी खबरदारी घेणे आवश्यक आहे. 

उष्णतेपासून बचावासाठी 'हे' करा

१. हायड्रेटेड राहा: तहान लागलेली नसली तरीही भरपूर पाणी, लिंबू सरबत किंवा ताक प्या.

२. वेळेचे नियोजन: शक्यतो दुपारी १२ ते ४ या वेळेत थेट उन्हात जाणे टाळा.

३. पोशाख: फिकट रंगाचे आणि सुती कपडे वापरा.

४. लक्षणे ओळखा: चक्कर येणे, डोकेदुखी किंवा मळमळ जाणवल्यास त्वरित सावलीत विश्रांती घ्या आणि डॉक्टरांचा सल्ला घ्या.

हवामान अंदाज

येत्या काही दिवसांत तापमानाचा हा आलेख असाच चढा राहण्याची शक्यता असल्याने महाराष्ट्रातील नागरिकांनी उन्हाळ्याच्या तीव्रतेसाठी सज्ज राहावे.