महाराष्ट्रात मॉन्सूनचे आगमन! तळकोकणात जोरदार पाऊस, पुढील ३ दिवस महत्त्वाचे, या दिवशी येणार मुंबई-पुण्यात

महाराष्ट्रात यंदा मोसमी पाऊस नियोजित वेळेपेक्षा ११ दिवस आधी दाखल झाला आहे. रविवारी तळकोकणात पावसाने जोरदार हजेरी लावली असून, पुढील तीन दिवसांत मुंबई, पुणे, विदर्भ आणि उत्तर महाराष्ट्रात पावसाचा विस्तार होण्याची शक्यता आहे.

मुंबई: महाराष्ट्रात यंदा मोसमी पावसाने नियोजित वेळेपेक्षा तब्बल ११ दिवस आधीच हजेरी लावली आहे. प्रादेशिक हवामान विभागाच्या माहितीनुसार, रविवारी (२५ मे) पावसाने तळकोकणात जोरदार हजेरी लावली असून, कर्नाटक आणि संपूर्ण गोव्यातही पावसाचा जोर दिसून आला. यामुळे राज्यात मान्सूनची लवकर सुरुवात झाली असून, पुढील तीन दिवस हवामानात मोठा बदल अपेक्षित आहे.

तळकोकणात, विशेषतः देवगड परिसरात रविवारी सकाळपासूनच पावसाच्या सरी बरसल्या. यंदा मोसमी वारे केरळमध्येही वेळेआधी दाखल झाले होते आणि आता महाराष्ट्रातही लवकर प्रवेश करत आहेत. हवामान विभागाच्या म्हणण्यानुसार, अरबी समुद्रात तयार झालेल्या कमी दाबाच्या पट्ट्यामुळे मान्सूनला पोषक हवामान तयार झालं, आणि त्यामुळे पावसाने वेग घेतला.

पुढील ३ दिवसांमध्ये कोणकोणत्या भागात पाऊस?

हवामान खात्याच्या अंदाजानुसार, पुढील तीन दिवसांत पावसाचा विस्तार मुंबई, पुणे, विदर्भ आणि उत्तर महाराष्ट्रापर्यंत होणार आहे. मुंबई आणि पुण्यात नेहमी १०-११ जूनदरम्यान पाऊस दाखल होतो, मात्र यंदा तो त्याआधीच शहरात पोहोचण्याची शक्यता आहे.

राज्यात मोसमी पाऊस यंदा किती लवकर आला?

सामान्य आगमनाची तारीख (तळकोकण): ७ जून

यंदा पावसाचे आगमन: २५ मे (११ दिवस आधी)

गेल्या १६ वर्षांच्या तुलनेत यंदाचा मान्सून सर्वाधिक लवकर दाखल झाला आहे.

मागील वर्षांतील पावसाच्या आगमनाच्या तारखा:

२०२४: ६ जून

२०२३: ११ जून

२०२१: ५ जून

२०२०: ११ जून

२०१९: २० जून

राज्यात यंदा मान्सूनने लवकर आगमन करून शेतकरी वर्गासाठी, जलसाठ्यांसाठी आणि हवामान अभ्यासकांसाठी आशादायक संकेत दिले आहेत. पावसाचा पुढील विस्तार वेगाने होण्याची शक्यता असल्याने नागरिकांनी सावध राहावे, आणि आवश्यक ती पूर्वतयारी करावी, असा सल्ला हवामान विभागाकडून देण्यात आला आहे.

हवामान खात्याने काय सांगितले

हवामान विभागाने स्पष्ट केले आहे की, सद्यस्थितीतील पाऊस हा मान्सूनपूर्व तसाच मान्सूनचा असला तरीही त्याचा जोर आणि व्याप मोठ्या प्रमाणात जाणवतो आहे. विशेषतः रायगड आणि रत्नागिरी या किनारपट्टी जिल्ह्यांमध्ये आज रात्रीपर्यंत अतिमुसळधार पावसाची शक्यता वर्तवण्यात आली आहे. त्यामुळे या दोन्ही जिल्ह्यांसाठी हवामान विभागाने ‘रेड अलर्ट’ जारी केला आहे. याशिवाय, पालघर, ठाणे, सिंधुदुर्ग व अन्य किनारपट्टी भागांमध्ये ‘ऑरेंज अलर्ट’ देण्यात आला आहे, ज्याचा अर्थ या भागांतही पुढील काही तासांमध्ये मुसळधार पावसाचा धोका आहे.

मुंबई पुण्यात लवकरच दाखल होणार

हवामान विभागाच्या अंदाजानुसार, मान्सूनची गती सध्या अतिशय अनुकूल स्थितीत असून तो लवकरच महाराष्ट्राच्या इतर भागांत – विशेषतः मुंबई आणि पुणे शहरात – पुढील काही तासांत पोहोचण्याची शक्यता आहे. त्यामुळे प्रशासन आणि नागरिकांना आवश्यक ती खबरदारी घेण्याचे आवाहन करण्यात आले आहे.

ठिकठिकाणी साचले पाणी, वाहतूक कोंडी

मुंबईत कालपासूनच अधूनमधून जोरदार सरी पडत असून, अनेक ठिकाणी पाणी साचण्याच्या घटनाही नोंदवल्या गेल्या आहेत. रस्त्यांवर वाहतूक कोंडी झाली असून, लोकल वाहतुकीवर देखील पावसाचा परिणाम जाणवू लागला आहे. रत्नागिरी व रायगडसह कोकणातील इतर भागांतही जोरदार वारे आणि विजांच्या कडकडाटासह पावसाचा अनुभव येत आहे.

तज्ज्ञांचे म्हणणे आहे की, यंदाचा मान्सून अपेक्षेपेक्षा काहीसा लवकर दाखल होत असून, त्यामुळे शेतीच्या हंगामाची सुरुवातही लवकर होण्याची शक्यता आहे. मात्र, मान्सूनपूर्व टप्प्यातच जर पावसाचा जोर असा राहिला, तर काही भागांत पूरजन्य परिस्थिती निर्माण होण्याचा धोका नाकारता येत नाही.

हवामान विभागाचे आवाहन

हवामान खात्याने नागरिकांना समुद्र किनाऱ्याजवळ न जाण्याचे आणि अनावश्यक प्रवास टाळण्याचे निर्देश दिले आहेत. मच्छिमारांना समुद्रात न जाण्याचा सल्ला देण्यात आला आहे. तसेच स्थानिक प्रशासनालाही सज्ज राहण्याचे आदेश देण्यात आले आहेत.

मान्सूनच्या या सुरुवातीच्या टप्प्यात राज्य शासन आणि आपत्कालीन व्यवस्थापन यंत्रणेसमोर मोठे आव्हान निर्माण झाले आहे. यावेळी नागरिकांनी अधिकृत स्त्रोतांकडूनच हवामानाची माहिती घ्यावी आणि अफवांपासून दूर राहावे, असे आवाहनही करण्यात आले आहे.