शनी शिंगणापूर मंदिरात मांजरीची प्रदक्षिणा, व्हिडिओ व्हायरल

शनी शिंगणापूर मंदिरात एका मांजरीने शनीदेवाच्या मूर्तीभोवती सतत प्रदक्षिणा घातल्याचा व्हिडिओ व्हायरल झाला आहे. मांजरीच्या या विचित्र वर्तनाने भावक्तांमध्ये आश्चर्य निर्माण झाले आहे.

सहज गायी, कुत्री मंदिरात प्रदक्षिणा घालताना तुम्ही पाहिली असतील. पूजेच्या वेळी एक गाय मंदिरात येऊन प्रदक्षिणा घालत असल्याचा व्हिडिओही यापूर्वी बराच व्हायरल झाला होता. आता मात्र एक मांजर मंदिरात सतत प्रदक्षिणा घालत असल्याचा व्हिडिओ सोशल मीडियावर व्हायरल झाला असून, भाविकांनी आश्चर्य व्यक्त केले आहे. हा प्रकार घडला आहे महाराष्ट्रातील शनिदेवाचे प्रसिद्ध तीर्थक्षेत्र असलेल्या शनी शिंगणापूर येथे.

व्हिडिओमध्ये दिसत आहे की, शनी शिंगणापूर मंदिरातील मूर्तीला फुलांचा हार घालून पुढे दिवे लावले आहेत. तेथे येणारी एक मांजर काही वेळ इकडेतिकडे पाहून या मूर्तीभोवती एकामागून एक प्रदक्षिणा घालत आहे. मांजर पाच प्रदक्षिणा घालत असतानाच तेथे एक महिला आली आणि ती मूर्तीसमोर हात जोडून डोळे मिटून प्रार्थना करत बसली. तरीही मांजर घाबरून न जाता १० पेक्षा जास्त प्रदक्षिणा घातल्या. यावेळी आणखी एक महिला आणि एक पुरुषही तेथे येऊन देवासमोर नमस्कार करताना दिसत आहेत. मात्र मांजरीच्या या विचित्र वर्तनाने तेथील लोकांना आश्चर्यचकित केले.

मांजर शनीदेवाला प्रदक्षिणा घालत असल्याचे हे दृश्य तेथील सीसीटीव्ही कॅमेऱ्यात रेकॉर्ड झाले आहे. व्हिडिओ पाहून अनेकांनी आश्चर्य व्यक्त केले आहे. मांजरी देवता असतात, असे व्हिडिओ पाहून एकाने कमेंट केली आहे. तसेच मांजरीला त्रास देऊ नका, अशीही काहींनी प्रतिक्रिया दिली आहे. mewsinsta या इंस्टाग्राम पेजवरून हा व्हिडिओ पोस्ट करण्यात आला असून, लाखो लोकांनी तो पाहिला आहे. या मंदिराबद्दल बोलायचे झाले तर, शनी शिंगणापूर मंदिर हे देशातील प्रसिद्ध शनिदेवाचे क्षेत्र आहे. येथे भेट दिल्यास शनिदोष निवारण होतो, अशी भाविकांची श्रद्धा आहे. महाराष्ट्रातील शिर्डीजवळ असलेल्या या तीर्थक्षेत्राला दररोज हजारो भाविक भेट देतात.

तसेच हे मंदिर असलेले क्षेत्र अनेक चमत्कारांसाठी प्रसिद्ध आहे. येथील घरांना दारेच नाहीत, तरीही येथे कोणतेही चोरीचे प्रकार घडत नाहीत. जर कोणी चोरीचा प्रयत्न केला तर त्यांचा प्रयत्नही फसला जातो आणि त्यांना शिक्षा होते. तसेच येथील पोलीस ठाण्यात चोरी किंवा हिंसाचाराच्या घटना नोंदवल्या गेल्याचे वृत्त नाही. इतके धार्मिक पार्श्वभूमी असलेल्या शनी शिंगणापूर मंदिरात आता असा प्रकार घडल्याने भाविक आश्चर्यचकित झाले आहेत. हिंदू धर्मग्रंथांमध्ये प्रत्येक प्राण्याला पूजनीय स्थान आहे. चराचरांमध्ये भगवान आहे, या श्रद्धेप्रमाणे प्राणीही भगवंताचे स्मरण करतात, याचे काही घटना पुरावे आहेत.

मांजर प्रदक्षिणा घालत असल्याचा व्हिडिओ पहा