Ladki Bahin Yojana: ‘लाडकी बहीण’ योजनेत घोटाळ्याचा संशय!, 26 लाखांहून अधिक महिलांची घरोघरी पडताळणी सुरू

Ladki Bahin Yojana: राज्य सरकारच्या ‘माझी लाडकी बहिण’ योजनेत मोठा गैरव्यवहार झाल्याचा संशय असून 26.30 लाख महिला लाभार्थ्यांची पडताळणी सुरू आहे. अपात्र लाभार्थ्यांना वेगळं करणं आणि योजनेचा अपवापर थांबवणं हा या मोहिमेचा उद्देश आहे.

Mukhyamantri Majhi Ladki Bahin Yojana Update: राज्य सरकारच्या महत्त्वाकांक्षी ‘माझी लाडकी बहिण’ योजनेत मोठा गैरव्यवहार झाल्याचा संशय व्यक्त होत असून, 26.30 लाख महिला लाभार्थ्यांची प्रत्यक्ष घरोघरी जाऊन पडताळणी करण्याची मोहीम सरकारने सुरू केली आहे. या मोहिमेचा उद्देश म्हणजे अपात्र लाभार्थ्यांना वेगळं करणं आणि योजनेचा अपवापर थांबवणं.

काय आढळलं गैरव्यवहारात?

माहिती तंत्रज्ञान विभागाच्या प्राथमिक विश्लेषणानंतर काही धक्कादायक बाबी समोर आल्या आहेत

एका कुटुंबातील तीन किंवा अधिक महिलांनी नोंदणी केल्याचे आढळले.

वयोमर्यादा ओलांडलेल्या महिलांनाही लाभ मिळाल्याचे दिसले.

काही प्रकरणांमध्ये पुरुषांनीही खोट्या पद्धतीने अर्ज करून लाभ घेतल्याचे उघड झाले!

यामुळे सरकारने राज्यभरात अंगणवाडी सेविकांमार्फत व्यापक पडताळणी मोहिम हाती घेतली आहे.

पडताळणी मोहिमेतील अडचणी

या मोहिमेतील सर्वात मोठी अडचण म्हणजे अस्पष्ट पत्ते. शहरी भागात अनेक लाभार्थ्यांच्या नोंदणीमध्ये केवळ जिल्हा व शहराचे नाव दिले गेले आहे; संपूर्ण पत्ता नसल्याने अस्सल लाभार्थ्यांचा शोध घेणे कठीण बनले आहे.

अनेक ठिकाणी पत्ता चुकीचा आहे

काही घरी लाभार्थी सापडत नाहीत

यामुळे सेविकांचा मोठा वेळ आणि खर्च वाया जातो आहे

दीड महिना उलटूनही प्रक्रिया अपूर्ण

पडताळणीचे महत्त्वाचे निकष

सरकारकडून लाभार्थ्यांची पडताळणी खालील बाबींवर केली जात आहे.

वय: 21 ते 65 वर्षांदरम्यान

कुटुंबातील पात्र सदस्यांची संख्या: फक्त दोन महिलांना लाभ

वार्षिक उत्पन्न: 2.5 लाखांपेक्षा कमी

वाहन: कुटुंबाकडे चारचाकी वाहन आहे का?

नोकरी: लाभार्थी महिला सरकारी कर्मचारी तर नाही?

पडताळणी पथक घरभेटी देऊन संपूर्ण माहिती गोळा करत असून, वैवाहिक स्थिती, रोजगार, कुटुंबातील रचना यावरही भर दिला जात आहे.

अनेक नियमबाह्य लाभ उघडकीस

पडताळणीदरम्यान आतापर्यंत अनेक अशा प्रकरणांचा उलगडा झाला आहे जिथे अपात्र लाभार्थ्यांना अनधिकृतपणे लाभ दिला गेला आहे. यामुळे योजना चुकीच्या हातात जात असल्याचं स्पष्ट होतं.

‘माझी लाडकी बहिण’ योजना ही महिलांच्या आर्थिक सक्षमीकरणासाठी महत्वाची आहे. मात्र, योग्य लाभार्थ्यांपर्यंतच लाभ पोहोचावा यासाठी ही पडताळणी मोहीम अत्यंत गरजेची ठरत आहे. सरकारच्या या कारवाईमुळे येत्या काळात योजना अधिक पारदर्शक व प्रभावी होण्याची अपेक्षा आहे.