Jalgaon : ठाकरे गटाला पुन्हा जबर धक्का, उन्मेष पाटील ६ मार्चला शिंदे सेनेत प्रवेश करणार, जळगावची समिकरणे बदलणार

Jalgaon : माजी खासदार उन्मेष पाटील हे ६ मार्च रोजी मुंबईत शक्ती प्रदर्शन करत एकनाथ शिंदे यांच्या शिवसेनेत प्रवेश करणार आहेत. छत्रपती संभाजीनगर येथील बँकेकडून जप्ती कारवाई सुरू झाल्यानंतर त्यांच्या राजकीय भूमिकेत बदल झाल्याची चर्चा आहे. 

Jalgaon : शिवसेनेत उभी फूट पडल्यानंतर अनेक नेते एकनाथ शिंदे यांच्या नेतृत्वाखालील शिवसेनेत दाखल झाले. आता माजी खासदार आणि ठाकरे गटाचे नेते उन्मेश पाटील यांनीही शिंदे सेनेत प्रवेश करण्याचा निर्णय घेतला आहे. येत्या ६ मार्च रोजी मुंबईत शक्ती प्रदर्शन करत ते अधिकृतरित्या पक्षात दाखल होणार आहेत.

६ मार्चला मुंबईत प्रवेश सोहळा

उन्मेष पाटील यांचा प्रवेश सोहळा खासदार श्रीकांत शिंदे यांच्या उपस्थितीत पार पडणार असल्याची माहिती आहे. गेल्या महिन्यात पाटील यांनी श्रीकांत शिंदे यांची भेट घेत प्राथमिक चर्चा केली होती. त्यामुळे त्यांच्या प्रवेशाची चर्चा आधीपासूनच सुरू होती.

जप्ती कारवाईनंतर राजकीय निर्णय?

छत्रपती संभाजीनगर येथील एका सहकारी बँकेकडून थकीत कर्जापोटी मालमत्ता जप्तीची कारवाई सुरू झाल्यानंतर पाटील यांनी हा निर्णय घेतल्याची चर्चा राजकीय वर्तुळात रंगली आहे. त्यामुळे हा पक्षप्रवेश दबावाखाली तर होत नाही ना, असा प्रश्न उपस्थित केला जात आहे.

भाजप ते ठाकरे गट आणि आता शिंदे सेना

२०१९ मध्ये भाजपच्या तिकिटावर लोकसभेत निवडून आलेल्या पाटील यांना २०२४ मध्ये उमेदवारी नाकारण्यात आली होती. त्यानंतर त्यांनी उद्धव ठाकरे यांच्या नेतृत्वाखालील शिवसेनेत प्रवेश केला. २०२४ मध्ये त्यांनी चाळीसगाव विधानसभा निवडणूक लढवली, मात्र त्यांना पराभवाचा सामना करावा लागला. विधानसभा पराभवानंतर त्यांची राजकीय सक्रियता कमी झाल्याचे दिसून आले.

जळगावमध्ये नव्या समीकरणांची शक्यता

उन्मेष पाटील यांच्या शिंदे सेनेतील प्रवेशामुळे चाळीसगाव आणि जळगाव जिल्ह्यातील राजकीय समीकरणे बदलण्याची चिन्हे आहेत. शिंदे सेनेचे फायरब्रँड नेते गुलाबराव पाटील यांची प्रतिक्रिया काय असेल, याकडे सर्वांचे लक्ष लागले आहे. तसेच मित्र पक्ष भाजप आणि चाळीसगावचे आमदार Mangesh Chavan यांची भूमिका काय असेल, याबाबतही उत्सुकता आहे.