Medical Officer Bharti 2026: आरोग्य विभागात १४४० जागांवर मेगाभरती! डॉक्टरांसाठी सरकारी नोकरीची मोठी संधी; 'असा' करा अर्ज

Medical Officer Bharti 2026: महाराष्ट्र सार्वजनिक आरोग्य विभागाने 'वैद्यकीय अधिकारी (गट-अ)' पदांच्या १४४० जागांसाठी भरती प्रक्रिया सुरू केली आहे. बऱ्याच काळानंतर आरोग्य विभागात मेगा भरती होत असल्याने उमेदवारांमध्ये उत्साहाचे वातावरण आहे.

मुंबई : वैद्यकीय क्षेत्रात सरकारी नोकरी शोधणाऱ्या तरुण डॉक्टरांसाठी महाराष्ट्र सरकारने आनंदाची बातमी दिली आहे. महाराष्ट्र सार्वजनिक आरोग्य विभागाने 'वैद्यकीय अधिकारी (गट-अ)' पदांच्या तब्बल १४४० रिक्त जागा भरण्यासाठी अधिकृत अधिसूचना जारी केली आहे. बऱ्याच काळानंतर आरोग्य विभागात एवढ्या मोठ्या प्रमाणावर भरती होत असल्याने उमेदवारांमध्ये उत्साहाचे वातावरण आहे.

पदांचा तपशील आणि शैक्षणिक पात्रता

ही भरती प्रामुख्याने दोन श्रेणींमध्ये विभागली गेली आहे.

१. वैद्यकीय अधिकारी (गट-अ) - MBBS: उमेदवाराकडे मान्यताप्राप्त विद्यापीठाची MBBS पदवी असणे आवश्यक आहे.

२. वैद्यकीय अधिकारी (गट-अ) - विशेषज्ञ (Specialist): संबंधित विषयातील पदव्युत्तर पदवी (MD/MS), पदविका (Diploma) किंवा समतुल्य पात्रता असणे अनिवार्य आहे.

वयोमर्यादा आणि सवलत

खुला प्रवर्ग: १८ ते ३८ वर्षे.

मागासवर्गीय/EWS/अनाथ: नियमानुसार वयोमर्यादेत ५ वर्षांची सूट देण्यात आली आहे.

अर्ज शुल्क (Examination Fee)

खुला प्रवर्ग: १,००० रुपये.

राखीव प्रवर्ग (OBC/EWS/दिव्यांग/महिला/खेळाडू): ७०० रुपये.

(अर्ज शुल्क आणि फॉर्म भरण्याची प्रक्रिया पूर्णपणे ऑनलाईन असेल.)

महत्त्वाची तारीख लक्षात ठेवा!

इच्छुक उमेदवारांनी आपले अर्ज आणि परीक्षा शुल्क २० मार्च २०२६ पर्यंत ऑनलाईन पद्धतीने जमा करणे आवश्यक आहे. शेवटच्या क्षणाची घाई टाळण्यासाठी पात्र उमेदवारांनी लवकरात लवकर अर्ज प्रक्रिया पूर्ण करण्याचे आवाहन करण्यात आले आहे.

महत्त्वाची टीप

अर्ज भरण्यापूर्वी उमेदवारांनी आरोग्य विभागाच्या अधिकृत संकेतस्थळावरील मूळ जाहिरात सविस्तर वाचूनच आपली पात्रता तपासावी.