Maharashtra IAS Transfer: मंत्रिमंडळ बैठकीच्या दिवशी ७ वरिष्ठ अधिकाऱ्यांची धडक बदली, कुंभमेळ्याच्या पार्श्वभूमीवर शेखर सिंह यांच्यावर जबाबदारी
सार
Maharashtra IAS Transfer: सरकारने २०२७च्या नाशिक कुंभमेळ्याच्या नियोजनाला गती देण्यासाठी ७ वरिष्ठ IAS अधिकाऱ्यांच्या बदल्या केल्यात. या महत्त्वपूर्ण फेरबदलात, शेखर सिंह यांची कुंभमेळा आयुक्तपदी तर आयुष प्रसाद यांची नाशिक जिल्हाधिकारीपदी नियुक्ती केली
मुंबई: महाराष्ट्र सरकारने कुंभमेळा २०२७ च्या पार्श्वभूमीवर नियोजनाच्या तयारीला गती देत, ७ वरिष्ठ IAS अधिकाऱ्यांच्या बदल्यांचे आदेश जाहीर केले आहेत. विशेष म्हणजे हे आदेश मंगळवारी (७ ऑक्टोबर) संध्याकाळी, राज्य मंत्रिमंडळाच्या बैठकीनंतरच जारी करण्यात आले.
उपमुख्यमंत्री देवेंद्र फडणवीस यांच्या कार्यशैलीप्रमाणे, मंत्रिमंडळ बैठकीच्या दिवशी प्रशासनातील मोठे निर्णय घेतले जातात. याच परंपरेनुसार यावेळीही महत्त्वाच्या बदल्यांची घोषणा करण्यात आली.
या अधिकाऱ्यांच्या झाल्या मोठ्या बदल्या
एम. देवेंद्र सिंह – रत्नागिरीचे जिल्हाधिकारी पद सोडून आता महाराष्ट्र प्रदूषण नियंत्रण मंडळाचे सचिव म्हणून नियुक्त.
शेखर सिंह – पिंपरी चिंचवड महापालिकेचे आयुक्त पदावरून बदली; आता ते नाशिक कुंभमेळ्याचे आयुक्त म्हणून काम पाहतील.
जलज शर्मा – नाशिकचे जिल्हाधिकारी पद सोडून, आता नाशिक महानगर प्रदेश विकास प्राधिकरणाचे महानगर आयुक्त म्हणून नियुक्त.
आयुष प्रसाद – जळगाव जिल्हाधिकारी पदावरून बदली, आता ते नाशिकचे जिल्हाधिकारी म्हणून कार्यरत राहतील.
रोहन घुगे – ठाणे जिल्हा परिषदेचे मुख्य कार्यकारी अधिकारी, आता जळगाव जिल्हाधिकारी म्हणून बदली.
संजय कोलते – शिवशाही पुनर्वसन प्रकल्प, मुंबईचे व्यवस्थापकीय संचालक पदावरून बदली; पुण्याचे साखर आयुक्त म्हणून नियुक्त.
मनोज जिंदाल – महाराष्ट्र राज्य रस्ते विकास महामंडळाचे सहव्यवस्थापकीय संचालक पद सोडून, आता रत्नागिरीचे जिल्हाधिकारी म्हणून कार्यभार स्वीकारणार.
कुंभमेळ्यासाठी विशेष नियोजन, दोन महत्त्वाच्या IAS अधिकाऱ्यांची निवड
नाशिकमध्ये होणाऱ्या सिंहस्थ कुंभमेळ्यासाठी विशेष लक्ष देऊन, शेखर सिंह यांची कुंभमेळा आयुक्तपदी नियुक्ती ही मोठी जबाबदारी मानली जात आहे. ते पिंपरी चिंचवडमध्ये आयुक्तपदाच्या कार्यकाळात कार्यक्षम नेतृत्वासाठी ओळखले जातात.
त्याचप्रमाणे, आयुष प्रसाद हे अतिशय कार्यक्षम व लोकाभिमुख अधिकारी मानले जातात. त्यांची नाशिक जिल्हाधिकारीपदी बदली करताच, कुंभमेळ्याच्या सुरळीत नियोजनासाठी राज्य सरकारने पहिलं पाऊल उचललं आहे.
प्रशासनिक हालचालींमागे रणनीतीचा भाग
राज्य सरकारच्या दृष्टीने या बदल्या केवळ नियमित नाहीत, तर आगामी कुंभमेळा, शहर विकास, पर्यावरण व्यवस्थापन आणि प्रादेशिक विकास प्रकल्पांशी संबंधित महत्त्वाचे निर्णयात्मक टप्पे आहेत.
देवेंद्र फडणवीस यांच्या नेतृत्वाखाली अशा बदल्यांद्वारे प्रशासकीय यंत्रणेतील कार्यक्षमता वाढवण्याचा प्रयत्न सातत्याने दिसून येतो.