पुण्यात लाडूमध्ये सापडला मानवी अंगठा... अन्न व औषध प्रशासनाकडून चौकशी सुरु, परिसरात उडाली खळबळ

या प्रकारातून अन्नप्रक्रिया क्षेत्रातील हलगर्जीपणा आणि जबाबदारीचा अभाव पुन्हा एकदा समोर आला आहे. स्वच्छता, सुरक्षा आणि ग्राहकांचा विश्वास यात काही गडबड झाली तर त्याचे गंभीर परिणाम होऊ शकतात. 

आंबेगाव (पुणे)- पुणे जिल्ह्यातील आंबेगाव तालुक्यातील एका हलवायाकडून विकत घेतलेल्या लाडूमध्ये मानवी अंगठा सापडल्याची अत्यंत धक्कादायक घटना समोर आली आहे. या प्रकारामुळे अन्न सुरक्षा आणि स्वच्छतेविषयी गंभीर प्रश्न उपस्थित झाले असून, अन्न व औषध प्रशासन (FDA) विभागाने तातडीने कारवाई करत चौकशी सुरू केली आहे.

१ जून रोजी उघड झाला प्रकार

हिंदुस्तान टाइम्सच्या वृत्तानुसार, गोहे बुद्रुक गावातील रहिवासी रामचंद्र पोतकुळे यांनी १ जून रोजी डिंभेगाव येथील नित्यानंद हॉटेलमधून २५० ग्रॅम लाडू आणि काही भेळ विकत घेतली होती. हे मिठाईचे सामान त्यांनी घरी नेले. जेवणानंतर जेव्हा कुटुंबाने लाडू खायला सुरुवात केली, तेव्हा एका लाडूमध्ये मानवी अंगठा असल्याचे लक्षात आले.

यामुळे कुटुंबातील सदस्यांना अतिसार आणि मळमळ होण्यास सुरुवात झाली. अखेर ३ जून रोजी त्यांनी FDA कडे अधिकृत तक्रार दाखल केली.

हॉटेल मालकाच्या मुलाचा अपघात; अंगठा लाडूमध्ये मिसळला गेला

FDA कडून करण्यात आलेल्या प्राथमिक तपासात असे उघड झाले आहे की, संबंधित मानवी अंगठा हा नित्यानंद हॉटेलच्या मालक बाळू भोकरेंच्या मुलाचा आहे. तपासाअंती समोर आले की, लाडू तयार करत असताना त्याचा मुलगा विद्युत-चालित लाडू मिक्सिंग मशीन चालवत होता. यावेळी अचानक वीज गेली आणि पुन्हा वीज आल्यानंतर मशीनमध्ये त्याचा हात अडकून अंगठा छाटला गेला.

यावेळी मशीन तोडून त्याचा हात बाहेर काढण्यात आला आणि त्याला तातडीने रुग्णालयात दाखल करण्यात आले. पण धक्कादायक बाब म्हणजे, त्या घटनेनंतरही तयार केलेला लाडूचा साठा बाजारात विक्रीसाठी देण्यात आला.

संपूर्ण साठा नष्ट न करता विक्रीसाठी ठेवला!

गोहे बुद्रुकचे सरपंच कैलास गेंगजे यांनी यासंदर्भात सांगितले की, अपघातानंतर संशयित मिठाईचा साठा न नष्ट करता थेट विक्रीसाठी ठेवण्यात आला, ही अत्यंत निष्काळजीपणाची बाब आहे. त्यामुळे गावात आणि जिल्ह्यात संतापाची लाट उसळली आहे.

FDA ची कारवाई; कडक पावले उचलणार

पुणे FDAचे सहआयुक्त सुरेश अन्नापूरे यांनी याप्रकरणी म्हटले, “आमच्या अधिकाऱ्यांनी हॉटेल मालक व कर्मचाऱ्यांची चौकशी केली असून घडलेल्या घटनेचा सविस्तर तपास सुरू आहे. हा प्रकार अत्यंत गंभीर आहे. चौकशी पूर्ण झाल्यानंतर कठोर कारवाई केली जाईल.”

मुंबईतील 'फिंगर इन आईसक्रीम' प्रकरणाची आठवण

ही घटना २०२४ मधील मुंबईतील एका प्रसिद्ध प्रकरणाशी साम्य दर्शवते. तेव्हा एका ग्राहकाला ऑनलाइन मागवलेल्या आईसक्रीममध्ये मानवी बोट सापडले होते. त्या प्रकरणात पुण्याच्या इंदापूर तालुक्यातील फॉर्च्यून डेअरी इंडस्ट्रीज या पुरवठादार कंपनीवर बंदी घालण्यात आली होती.

FDA कडून जनतेला आवाहन

तपास सुरू असून FDA ने जनतेला आवाहन केले आहे की, कोणताही अन्नपदार्थ संशयास्पद वाटल्यास तात्काळ तक्रार करावी. सार्वजनिक आरोग्य हीच आमची सर्वोच्च प्राथमिकता आहे, असे पुणे FDA विभागाने स्पष्ट केले आहे.

या प्रकारातून अन्नप्रक्रिया क्षेत्रातील हलगर्जीपणा आणि जबाबदारीचा अभाव पुन्हा एकदा समोर आला आहे. स्वच्छता, सुरक्षा आणि ग्राहकांचा विश्वास यात काही गडबड झाली तर त्याचे गंभीर परिणाम होऊ शकतात. अशा प्रकारांमध्ये दोषींवर कठोर कारवाई होणे आवश्यक आहे, जेणेकरून भविष्यात कोणतीही व्यक्ती अशा धोकादायक अनुभवाला सामोरी जाऊ नये.