नाशिकमध्ये वाढदिवशीच गुंडाचा खून, वाढदिवसाचे निमंत्रण देताना धारदार शस्त्रांनी वार

नाशिकच्या जेलरोड परिसरात एका गुंडाची धारदार शस्त्राने हत्या करण्यात आली. मृत व्यक्ती आपल्या मुलीच्या वाढदिवसाच्या निमित्ताने मित्रांना आमंत्रण देत असताना ही घटना घडली. हल्लेखोर हा मृताचा मित्र असल्याचे समोर आले आहे.

नाशिक – तडीपार गुंडांचा परस्परांचा संघर्ष गुरुवारी (दि. १ मे) रात्री नाशिकच्या जेलरोड परिसरात एका भीषण हत्याकांडात परिवर्तित झाला. बालाजीनगर येथे रात्री सव्वादहा वाजता धारदार शस्त्र आणि लोखंडी रॉडचा वापर करत, एका गुंडाने दुसऱ्या गुंडाचा निर्घृण खून केल्याने परिसरात खळबळ उडाली आहे. विशेष म्हणजे मृत व्यक्ती आपल्या लहान मुलीच्या वाढदिवसासाठी मित्रांना आमंत्रण देत असताना त्याला मृत्यू आलिंगन देईल, याची त्याला कल्पनाही नव्हती.

हत्या झाली ती मित्राच्या हातूनच! 

मृताची ओळख हितेश सुभाष डोईफोडे (रा. संजय गांधी नगर, जेलरोड) अशी असून, त्याचा मित्र रोहित नंदकिशोर बंग (वय २८) देखील या हल्ल्यात गंभीर जखमी झाला आहे. या थरारक घटनेतून रोहित थोडक्यात बचावला. त्याने दिलेल्या जबाबावरून पोलिसांनी नीलेश पेखळे (रा. बालाजीनगर) आणि त्याच्या दोन साथीदारांविरुद्ध खुनाचा गुन्हा दाखल करून काही तासांतच नीलेशला अटक केली आहे.

हल्ला अचानक आणि ठरवून झाल्याचा संशय हितेशने आपल्या दुचाकीवरून संशयित नीलेशच्या घरासमोर गाडी उभी केली आणि तिथेच त्यांच्यात वाद झाला. काही क्षणांतच नीलेशने गेटला अडकवलेल्या पिशवीतून धारदार शस्त्र बाहेर काढून थेट हितेशच्या डोक्यावर घाव घातला. रोहित खाली उतरत असतानाच त्याच्यावरही लोखंडी रॉडने हल्ला करण्यात आला.

रक्तबंबाळ स्थितीत जीव वाचवण्यासाठी हितेशने पळ काढला, पण त्याचा पाठलाग करत संशयितांनी रस्त्यावरच त्याचा खून केला. तर जखमी रोहितने शिताफीने जवळच्या गवतात लपून स्वतःचा जीव वाचवला. मोबाइलवरून भावाला कळवलं, पण… रस्त्यावरून जाणाऱ्या एका अनोळखी व्यक्तीच्या मोबाइलवरून रोहितने आपल्या भावाला संपर्क साधून घटनेची माहिती दिली. त्याचा भाऊ राहुल याने त्याला तातडीने बिटको रुग्णालयात दाखल केले. दुसरीकडे, संशयित नीलेशनेच गंभीर जखमी हितेशला जिल्हा शासकीय रुग्णालयात नेले. मात्र, डॉक्टरांनी त्याला मृत घोषित केलं.

वाढदिवसाची तयारी मृत्यूत बदलली मुलीचा वाढदिवस साजरा करण्याच्या तयारीत असलेल्या हितेशचा आयुष्याचा शेवट असा व्हावा, हे कुणालाही पटणं कठीण आहे. गुरुवारी तो मित्रासोबत आमंत्रण देण्यासाठी निघाला होता आणि अनपेक्षितरित्या त्याचा शेवटच झाला.

पोलिस तपास सुरू, गुन्हेगारी रेषा ओलांडली का? या घटनेमुळे नाशिकमधील तडीपार गुंडांमधील अंतर्गत कुरबुरी आणि वर्चस्वाच्या संघर्षाने पुन्हा डोकं वर काढलं आहे. पोलीस आता या घटनेमागील नेमकं कारण शोधण्याचा प्रयत्न करत असून, गुन्हेगारी टोळ्यांमध्ये चाललेली शीतयुद्धाची पार्श्वभूमीही तपासली जात आहे.