Ganeshotsav 2025 : श्रीगणेशोत्सवासाठी सार्वजनिक मंडळांसाठी ‘एक खिडकी प्रणाली’ सुरू; ऑनलाइन अर्जाची संपूर्ण प्रक्रिया घ्या जाणून

यंदा गणेशोत्सवाचा सण 27 ऑगस्टपासून सुरू होणार आहे. तत्पूर्वी आतापासूनच सार्वजनिक मंडळांची लगभग सुरू झाली आहे. अशातच महाराष्ट्र सरकारने सार्वजनिक मंडळांसाठी ऑनलाइन एक खिडकी प्रणाली सुरू केली आहे. याबद्दलच सविस्तर जाणून घेऊया.

मुंबई : महाराष्ट्र शासनाने यावर्षीपासून ‘श्रीगणेशोत्सव’ हा राज्य उत्सव म्हणून घोषित केला असून, मुंबईत हा उत्सव अधिक नियोजनबद्ध आणि पर्यावरणपूरक पद्धतीने साजरा करण्यासाठी बृहन्मुंबई महानगरपालिका सज्ज झाली आहे. मुंबईतील सार्वजनिक श्रीगणेशोत्सव मंडळांसाठी लागणाऱ्या विविध परवानग्या आता ‘एक खिडकी प्रणाली’द्वारे ऑनलाइन मिळणार असून, सोमवार, २१ जुलै २०२५ पासून ही सुविधा महानगरपालिकेच्या https://portal.mcgm.gov.in या संकेतस्थळावर सुरू करण्यात आली आहे.

मंडप परवानगी अर्ज करण्यासाठी प्रक्रिया

मुंबईतील हजारो सार्वजनिक श्रीगणेशोत्सव मंडळांनी सार्वजनिक किंवा खासगी जागांवर मंडप उभारणीसाठी परवानगी घ्यावी लागते. यासाठी आता फक्त काही मिनिटांत ऑनलाइन अर्ज भरता येणार आहे. मंडळांना स्थानिक पोलीस आणि वाहतूक विभागाकडे वेगवेगळ्या ना-हरकत प्रमाणपत्रासाठी धावपळ करण्याची आवश्यकता राहणार नाही. ही संपूर्ण प्रक्रिया विभागीय सहाय्यक आयुक्त आणि परिमंडळीय उप आयुक्त यांच्या मार्गदर्शनाखाली पार पडेल.

अर्ज कसा कराल?

सार्वजनिक मंडळांनी मंडपासाठी परवानगीचा अर्ज बृहन्मुंबई महानगरपालिकेच्या वेबसाइटवरील ‘नागरिकांकरिता’ या रकान्यात ‘अर्ज करा’ विभागातून ‘मंडप (सार्वजनिक गणेशोत्सव/नवरात्र/इतर उत्सव)’ या लिंकवर जाऊन करावा लागेल. ही प्रक्रिया अतिशय सोपी आणि वापरण्यास सोयीची करण्यात आली आहे.

रस्त्यांवर खड्डे टाळा – महापालिकेचे आवाहन

मंडप उभारणीदरम्यान रस्त्यांवर खड्डे टाळावेत, यासाठी महापालिकेने प्रभावी पर्याय सुचवले आहेत. खड्डा आढळल्यास संबंधित मंडळांकडून दंड आणि रस्त्याच्या दुरुस्तीसाठीचा खर्च वसूल केला जाईल.

पर्यावरणपूरक मूर्ती आणि सजावट हवीच!

श्रीगणेशोत्सव अधिक पर्यावरणस्नेही करण्यासाठी महापालिकेने विविध पावले उचलली आहेत. सर्व मंडळांनी **शाडू मातीच्या मूर्ती**, नैसर्गिक सजावट साहित्याचा वापर करावा, असे आवाहन करण्यात आले आहे. यंदा ९०७ टन शाडू माती मोफत वाटप करण्यात आले असून, ९७९ मूर्तिकारांना मंडप उभारण्यासाठी जागा उपलब्ध करून देण्यात आली आहे.

श्रीगणेशाची स्थापना २७ ऑगस्ट २०२५ रोजी होणार असून, मुंबईतील हा उत्सव अधिक जनतेच्या सहभागाने आणि पर्यावरणपूरक रीतीने पार पडावा, यासाठी महानगरपालिकेचे प्रयत्न सुरू आहेत. गणेशभक्त आणि मंडळांनी त्यास सहकार्य करावे, असे आवाहन पालिकेकडून करण्यात आले आहे.