Solapur Crime : 'बाळू मामाचा अवतार’ म्हणवणारा भोंदू अटकेत; सोलापूर पोलिसांची मोठी कारवाई

Solapur Crime : ‘बाळू मामाचा अवतार’ असल्याचा दावा करणाऱ्या मनोहर भोसलेला सोलापूर ग्रामीण पोलिसांनी अटक केली. आर्थिक फसवणूक, अंधश्रद्धा आणि महिलांवरील अत्याचारांच्या अनेक गुन्ह्यांत तो आधीपासूनच आरोपी आहे.

Solapur Crime : राज्यात भोंदूबाबांच्या वाढत्या प्रकरणांदरम्यान आणखी एक धक्कादायक घटना समोर आली आहे. स्वतःला ‘बाळू मामाचा अवतार’ म्हणवणाऱ्या मनोहर मामा भोसले याला सोलापूर ग्रामीण पोलिसांनी अटक केली आहे. आर्थिक फसवणूक, अंधश्रद्धा पसरवणे आणि महिलांवरील अत्याचार यांसारख्या गंभीर आरोपांमुळे ही कारवाई करण्यात आली असून या प्रकरणाने पुन्हा एकदा समाजातील भोंदुगिरीचा प्रश्न ऐरणीवर आणला आहे.

विविध पोलीस ठाण्यांत गंभीर गुन्हे दाखल

मनोहर मामा भोसले याच्यावर यापूर्वीच अनेक गुन्हे दाखल आहेत. करमाळा आणि सोलापूर तालुका पोलीस ठाण्यांत महिलांवरील अत्याचाराचे प्रकरण नोंदवण्यात आले होते. याशिवाय बारामती आणि दौंड येथे आर्थिक फसवणूक आणि भोंदुगिरीचे गुन्हे दाखल आहेत. आता कुर्डूवाडी पोलीस ठाण्यातही नवीन गुन्हा दाखल करण्यात आला आहे.

जामिनावर असतानाच पुन्हा कारवाई

मनोहर भोसलेवर ‘कॅन्सरसारखे आजार बरे करतो’ असे खोटे दावे करून लोकांची फसवणूक केल्याचा आरोप आहे. महिलांवरील अत्याचाराच्या प्रकरणात त्याला बार्शी सत्र न्यायालयाने जामीन मंजूर केला होता. मात्र जामिनावर असतानाच त्याच्याविरोधात नव्याने गुन्हा दाखल झाल्याने पोलिसांनी त्याला पुन्हा ताब्यात घेतले.

फसवणुकीची पद्धत; ‘पूजाअर्चा’च्या नावाखाली लूट

हा भोंदूबाबा सामान्य नागरिकांना ‘व्यवसायात भरभराट होईल’ किंवा ‘वाईट शक्ती दूर होतील’ असे सांगून पूजाअर्चेचे आमिष दाखवत असे. एका प्रकरणात त्याने एका व्यक्तीकडे दोन लाख रुपयांची मागणी केली होती, त्यापैकी ५० हजार रुपये घेतल्याचे समोर आले आहे.

पुण्यातून अटक; तपासाला वेग

फसवणुकीची जाणीव झाल्यानंतर पीडिताने कुर्डूवाडी पोलीस ठाण्यात तक्रार दाखल केली. त्यानुसार पोलिसांनी तपासाची चक्रे वेगाने फिरवत भोसलेला पुणे येथून अटक केली. त्याच्यावर आर्थिक फसवणूक, जादूटोणा विरोधी कायदा आणि अंधश्रद्धा निर्मूलन कायद्यांतर्गत गुन्हे दाखल करण्यात आले आहेत.

समाजात वाढती भोंदुगिरी; नागरिकांना सावध राहण्याचे आवाहन

या प्रकरणामुळे राज्यात भोंदू बाबांच्या वाढत्या घटनांबाबत पुन्हा एकदा चिंता व्यक्त केली जात आहे. पोलिसांनी नागरिकांना अशा फसवणुकीपासून सावध राहण्याचे आणि संशयास्पद बाबींविषयी त्वरित तक्रार करण्याचे आवाहन केले आहे.