पुणे भाजपमध्ये 'घाटे' पर्व कायम! महापालिका निवडणुकीआधी शहराध्यक्षपदी पुन्हा धीरज घाटेंची निवड
सार
पुणे महापालिका निवडणुकांच्या पार्श्वभूमीवर भाजपने शहराध्यक्षपदी धीरज घाटे यांची पुन्हा एकदा निवड केली आहे. पक्षाने राज्यभरातील ५८ शहर जिल्हाध्यक्षांची यादी जाहीर केली असून, पुण्यात घाटे यांना पुन्हा संधी देण्यात आली आहे.
पुणे: पुणे महापालिका निवडणुकांचे बिगुल वाजण्याची शक्यता लक्षात घेता, भाजपने शहराध्यक्षपदी पुन्हा एकदा धीरज घाटे यांच्यावर विश्वास दर्शवला आहे. सर्वोच्च न्यायालयाच्या आदेशानंतर राज्यातील महापालिका निवडणुकांचा मार्ग मोकळा झाल्याने, भाजपने तातडीने संघटनात्मक बांधणीला सुरुवात केली आहे. या पार्श्वभूमीवर, पक्षाने राज्यभरातील ५८ शहर जिल्हाध्यक्षांची यादी जाहीर केली असून, पुणे शहराध्यक्षपदी धीरज घाटेंची निवड कायम ठेवली आहे.
भाजपने काही दिवसांपूर्वी या महत्त्वाच्या पदांसाठी निरीक्षकांची नेमणूक केली होती. पुणे शहर, मावळ, बारामती आणि पिंपरी-चिंचवडच्या निरीक्षणाची जबाबदारी खासदार धनंजय महाडिक यांच्याकडे सोपवण्यात आली होती. त्यांच्या निरीक्षणाखाली पुणे शहराध्यक्षपदासाठी मतदानही झाले.
या पदासाठी धीरज घाटे यांच्यासह माजी सभागृह नेते गणेश बिडकर, श्रीनाथ भिमाले आणि माजी नगरसेविका वर्षा तापकीर यांच्या नावांची चर्चा होती. मात्र, धीरज घाटे यांना शहराध्यक्ष म्हणून काम करण्यासाठी कमी कालावधी मिळाल्याने, त्यांना पुन्हा संधी मिळावी, अशी मागणी कार्यकर्ते आणि खुद्द घाटेंनी पक्षश्रेष्ठींकडे केली होती. गेल्या आठवड्यात शहरातील कार्यकर्ते आणि पदाधिकाऱ्यांची भूमिका जाणून घेत, निरीक्षकांनी आपला अहवाल प्रदेशाध्यक्षांकडे पाठवला. या निवडणूक प्रक्रियेत गणेश बिडकर, श्रीनाथ भिमाले आणि विद्यमान अध्यक्ष धीरज घाटे यांची नावे आघाडीवर होती.
शहराध्यक्षपदाच्या निवडणुकीपूर्वीच घाटेंनी आपला कार्यकाळ वाढवून देण्याची विनंती केली होती. त्यांच्या कार्यकाळात विधानसभा आणि लोकसभा निवडणुका आल्याने, सध्याच्या कार्यकारिणीला अधिक वेळ मिळावा, असा युक्तिवाद त्यांनी केला होता. अखेर पक्षाच्या कोअर कमिटीने धीरज घाटे यांच्या नावावर शिक्कामोर्तब केले.
२०२३ मध्ये भाजपने धीरज घाटे यांच्यावर विश्वास ठेवून पुणे शहराध्यक्षपदाची जबाबदारी सोपवली होती. त्यांनीही पक्षाच्या नेत्यांचा विश्वास सार्थ ठरवत लोकसभा निवडणुकीत भाजपला पुणे शहरातून मोठे यश मिळवून दिले. शहरातील सदस्य नोंदणी करून अनेकांना पक्षाशी जोडले. राष्ट्रीय स्वयंसेवक संघाचे स्वयंसेवक असलेले धीरज घाटे यांनी प्रचारक म्हणूनही काम केले आहे. २०१७ ते २०२२ या काळात त्यांनी पुणे महापालिकेत नगरसेवक आणि सभागृह नेते म्हणून प्रभावी कामगिरी बजावली आहे.