Baramati By Election : बारामती पोटनिवडणुकीत काँग्रेसची एन्ट्री! सुनेत्रा पवारांविरोधात आकाश मोरे रिंगणात

Baramati By Election : बारामती पोटनिवडणुकीत काँग्रेसने आकाश मोरे यांना उमेदवारी देत सुनेत्रा पवारांविरोधात थेट लढत निर्माण केली आहे. या निर्णयामुळे पवार कुटुंबाचा बालेकिल्ला असलेल्या बारामतीत राजकीय समीकरणे बदलण्याची शक्यता निर्माण झाली आहे.

Baramati By Election : महाराष्ट्रातील बारामती पोटनिवडणुकीच्या पार्श्वभूमीवर राजकीय वातावरण चांगलेच तापले आहे. महाविकास आघाडीतील काही पक्ष बिनविरोध निवडणुकीसाठी प्रयत्न करत असताना, काँग्रेसने मात्र स्वतंत्र भूमिका घेत सुनेत्रा पवार यांच्या विरोधात उमेदवार उभा केला आहे. काँग्रेसने आकाश मोरे यांना अधिकृत उमेदवार घोषित करत बारामतीतील राजकीय समीकरणांना नवे वळण दिले आहे.

बारामतीत पुन्हा राजकीय रंगत

बारामती मतदारसंघ हा दीर्घकाळापासून पवार कुटुंबाचा बालेकिल्ला मानला जातो. सुनेत्रा पवार या या पोटनिवडणुकीत रिंगणात उतरल्या असून त्यांच्या विरोधात काँग्रेसने उमेदवार देण्याचा निर्णय घेतल्याने ही लढत अधिकच चुरशीची होण्याची शक्यता आहे. महाविकास आघाडीतही या निर्णयामुळे अंतर्गत राजकारणाला वेग आला आहे.

आकाश मोरे यांची राजकीय पार्श्वभूमी

आकाश मोरे हे व्यवसायाने वकील असून महाराष्ट्र प्रदेश काँग्रेस समितीचे सचिव म्हणून कार्यरत आहेत. त्यांचे वडील विजयराव मोरे हे विधान परिषदेचे सदस्य होते, त्यामुळे त्यांना राजकीय वारसा लाभला आहे. आकाश मोरे यांनी यापूर्वीही बारामतीतून निवडणूक लढवली असून २०१४ मध्ये त्यांनी अजित पवार यांच्या विरोधात निवडणूक लढवली होती.

2014 नंतर पुन्हा मैदानात

२०१४ च्या निवडणुकीत आकाश मोरे यांना पराभव पत्करावा लागला होता आणि ते चौथ्या क्रमांकावर राहिले होते. मात्र, आता ते पुन्हा एकदा बारामतीच्या पोटनिवडणुकीत नशीब आजमावत आहेत. यावेळी त्यांच्यासमोर सुनेत्रा पवार यांचे मोठे आव्हान असणार आहे.