King Of Sweets : राजांच्या स्वयंपाकघरातून घराघरात पोहोचलेला 'मिठाईचा राजा' कोणता?

लहानांपासून मोठ्यांपर्यंत सर्वांनाच गोड पदार्थ आवडतात. प्रत्येकाची आवड वेगळी असते. पण बाजारात मिळणाऱ्या सर्व मिठाईंमध्ये 'किंग ऑफ स्वीट्स' कोणता आहे हे तुम्हाला माहीत आहे का? फक्त राजांसाठी बनवली जाणारी ही मिठाई घराघरात कशी पोहोचली?

मिठाईचा राजा कोणता?

सण असो वा घरातील एखादं छोटं शुभकार्य, गोड पदार्थ तर लागतोच. बाजारात शेकडो प्रकारच्या मिठाई मिळतात. पण या सर्वांचा एक राजा आहे. पूर्वी ही मिठाई फक्त राजांसाठीच बनवली जायची. साजूक तुपात बनवलेला हा पदार्थ नंतरच्या काळात सर्वसामान्यांपर्यंत पोहोचला. ही मिठाई दुसरी तिसरी कोणतीही नसून 'म्हैसूर पाक' आहे.

राजांच्या स्वयंपाकघरातून सुरुवात

म्हैसूर पाकची गोष्ट १९ व्या शतकाच्या शेवटी म्हैसूरच्या 'वाडियार' संस्थानात सुरू झाली. म्हैसूरचे चौथे राजे कृष्णराज वाडियार यांना गोड पदार्थ खूप आवडायचे. एकदा जेवताना ताटात गोड पदार्थ नव्हता. तेव्हा त्यांचा आचारी काकासूर मडप्पा याने एक प्रयोग केला. त्याने बेसन, तूप आणि साखरेचा पाक एकत्र करून झटपट एक पदार्थ बनवला आणि राजांना वाढला. राजांना तो खूप आवडला आणि त्यांनी त्याचे नाव विचारले. मडप्पाने गडबडीत 'म्हैसूर' आणि 'पाक' (कन्नडमध्ये साखरेचा पाक) जोडून 'म्हैसूर पाक' असे नाव सांगितले. नंतर राजांनी हा पदार्थ राजवाड्याबाहेर विकण्यास प्रोत्साहन दिले आणि देवराज मार्केटमध्ये 'गुरू स्वीट्स' सुरू झाले. आजही त्यांचे वंशज हे दुकान चालवतात!

म्हैसूर पाकचे प्रकार आणि कृती

म्हैसूर पाकचे दोन प्रकार आहेत. पारंपारिक म्हैसूर पाक थोडा कडक आणि जाळीदार असतो, जो तोंडात टाकताच विरघळतो. तर सॉफ्ट किंवा तूप म्हैसूर पाक आधुनिक काळात लोकप्रिय झाला आहे, ज्याला मिल्क म्हैसूर पाकही म्हणतात. घरी बनवण्यासाठी १ कप बेसन, २-३ कप तूप, २ कप साखर, १ कप पाणी आणि चिमूटभर वेलची पावडर लागते. अर्धा कप तुपात बेसन ८-१० मिनिटे भाजून घ्या. दुसऱ्या भांड्यात साखर आणि पाण्याचा एकतारी पाक बनवा. पाकात भाजलेले बेसन आणि उरलेले गरम तूप थोडे थोडे घालत सतत ढवळा. मिश्रण घट्ट होऊन कडा सोडू लागले की तूप लावलेल्या ट्रेमध्ये ओता. १०-१५ मिनिटांनी कोमट असतानाच चौकोनी तुकडे कापा.