घरात पक्षी येऊन घाण करू नये म्हणून काय करायला हवं?

शहरांमध्ये पक्ष्यांमुळे घरात घाण होण्याच्या वाढत्या तक्रारींवर तज्ज्ञांनी सोपे उपाय सुचवले आहेत. जाळ्या, चमकदार वस्तू, बनावट गरुड आणि स्वच्छता यांसारख्या उपायांनी पक्ष्यांचा त्रास कमी करता येतो. 

शहरांमध्ये कबूतर, चिमण्या आणि इतर पक्ष्यांमुळे घरात घाण होण्याच्या तक्रारी वाढत आहेत. पक्ष्यांचे घराच्या गॅलरीत वसती करणे, खिडक्यांवर बसून घाण करणे, तसेच त्यांच्या विष्ठेमुळे आरोग्यावर विपरीत परिणाम होण्याची भीती व्यक्त केली जात आहे. या समस्येवर तज्ज्ञांनी काही सोपे उपाय सुचवले आहेत.

तज्ज्ञांच्या मते, खिडक्या आणि बाल्कनीमध्ये जाळी बसवल्यास पक्ष्यांचा प्रवेश रोखता येतो. तसेच अॅल्युमिनियम फॉइलच्या पट्ट्या, जुन्या CD किंवा चमकदार वस्तू टांगल्याने पक्षी त्या भागात येत नाहीत. काही ठिकाणी बनावट गरुड किंवा घार बसवल्यास कबूतर लांब राहतात.

साफसफाई तज्ज्ञांच्या मते, घरात उघड्या अन्नपदार्थांमुळे पक्षी वारंवार येतात, त्यामुळे स्वच्छता राखणे आवश्यक आहे. काही जण पक्षांना उघड्यावर दाणे टाकतात, त्यामुळे पक्ष्यांची वर्दळ वाढते. याशिवाय, मिरपूड, लसूण, व्हिनेगरचा स्प्रे वापरल्यास पक्षी त्या ठिकाणी बसत नाहीत.

याबाबत महापालिकेच्या अधिकाऱ्यांचे म्हणणे आहे की, कबूतरांमुळे श्वसनाचे विकार होण्याची शक्यता असते, त्यामुळे घरात त्यांना घरटे बनवू न देणे हा आरोग्याच्या दृष्टीने महत्त्वाचा मुद्दा आहे.

नागरिकांनी सतर्क राहून योग्य उपाय करावेत, असे आवाहन प्रशासनाकडून करण्यात आले आहे.