Food Divorce : 'आज जेवायला काय?' या प्रश्नावरून होणारे वाद टाळणारा नवा फंडा!

रोजच्या जेवणाच्या आवडीनिवडी, वेळा आणि सवयींवरून नवरा-बायकोमध्ये सतत वाद होत असतील, तर काही जोडपी आता 'फूड डिव्होर्स' नावाचा एक सोपा मार्ग वापरत आहेत. यामुळे त्यांच्यातील रोजची भांडणं टाळण्यास मदत होत आहे.

Food Divorce : प्रत्येक नात्यामध्ये छोटे-मोठे वाद आणि मतभेद होणं खूप सामान्य गोष्ट आहे. पण प्रत्येक लहान गोष्ट मोठं भांडणाचं कारण बनेलच असं नाही. अनेकदा तर नवरा-बायकोच्या भांडणाला कोणतंही गंभीर कारण नसतं. उलट, रोज समोर येणारा एक साधा प्रश्न याला कारणीभूत ठरतो - 'आज जेवायला काय बनवायचं?' याच प्रश्नावरून अनेक घरांमध्ये महाभारत घडतं. पण 'फूड डिव्होर्स' म्हणजे नवरा-बायको किंवा पार्टनरने एकमेकांपासून वेगळं होणं अजिबात नाही. याचा सरळ आणि सोपा अर्थ आहे की, जेवणाच्या बाबतीत प्रत्येक वेळी एकाने दुसऱ्यासाठी आपली आवड मारण्याची गरज नाही.

उदाहरणार्थ, समजा एकाला पोळी-भाजी खाविशी वाटत असेल आणि दुसऱ्याला नूडल्स खाण्याची इच्छा असेल. अशावेळी दोघांनी एकाच पदार्थावर एकमत झालंच पाहिजे, असा काही नियम नाही. एकजण आपल्या आवडीचं खाऊ शकतो, तर दुसरा त्याच्या आवडीचा पदार्थ खाऊ शकतो. इतकंच नाही, तर दोघांनी एकाच वेळी जेवायला बसलं पाहिजे, याचंही दडपण यातून निघून जातं.

रोजचा 'आज काय खाऊया?' हा प्रश्न डोकेदुखी बनलाय का?

बहुतेक घरांमध्ये संध्याकाळ झाली की एक प्रश्न हमखास विचारला जातो - 'आज काय खाणार?' त्यावर उत्तर येतं, 'माहित नाही, तूच सांग'. मग पास्ता करायचा की भात, घरचं जेवण बनवायचं की बाहेरून ऑर्डर करायचं, यावर चर्चा सुरू होते. एक-दोन दिवस असे मतभेद होणं ठीक आहे. पण हीच गोष्ट रोजच्या भांडणाचं कारण बनत असेल, तर जेवणासारखी साधी गोष्टही मानसिक ताण देऊ शकते.

काय बनवायचं, सामान कोण आणणार, स्वयंपाक कोण करणार आणि कोणाच्या आवडीला जास्त महत्त्व द्यायचं, या गोष्टी रोजच्या जबाबदारीचा भाग बनून जातात. अशा परिस्थितीत, 'फूड डिव्होर्स' काही जोडप्यांसाठी हा ताण कमी करण्याचा एक चांगला मार्ग ठरू शकतो.

'फूड डिव्होर्स'चा अर्थ असा नाही की तुम्ही कधीच एकत्र जेवू नये. जेव्हा दोघांची इच्छा असेल, तेव्हा एकत्र जेवायला काहीच हरकत नाही. वीकेंडला एकत्र नाश्ता करू शकता किंवा खास दिवशी बाहेर डिनरला जाऊ शकता. पण एखाद्या दिवशी जर दोघांच्या जेवणाच्या आवडी पूर्णपणे वेगळ्या असतील, तर त्यासाठी भांडण करण्याची गरज नाही. एकजण आपल्या आवडीचं आणि दुसरा आपल्या आवडीचं खाऊ शकतो.

वेगवेगळं जेवणं नात्यासाठी वाईट आहे का?

प्रत्येक नात्याचे स्वतःचे असे काही नियम आणि जुळवून घेण्याच्या पद्धती असतात. जोडप्याने प्रत्येक गोष्ट एकत्रच केली पाहिजे, असा काही कायदा नाही. काही जोडप्यांच्या झोपण्याच्या आणि उठण्याच्या वेळा वेगवेगळ्या असू शकतात. काहींचे छंद वेगळे असू शकतात. काही जण आपला मोकळा वेळ आपापल्या पद्धतीने घालवणं पसंत करतात. तसंच जेवणाच्या बाबतीतही मतभेद असू शकतात. काही लोकांसाठी एकत्र बसून जेवणं हे नात्याचा एक महत्त्वाचा भाग असू शकतं, तर काहींसाठी ते तितकं महत्त्वाचं नसतं. त्यामुळे, दोघं वेगवेगळं जेवतात फक्त या कारणावरून त्यांच्या नात्यात काहीतरी समस्या आहे, असं म्हणता येणार नाही.