Saree Reuse : आईच्या जुन्या साडीला फेकू नका, बनवा असे ५ ट्रेंडी ड्रेस; सगळे विचारतील 'कुठून घेतला?'

आईच्या कपाटात पडून असलेल्या जुन्या साड्या फेकून देऊ नका. त्या सिल्क, कांजीवरम किंवा जामदानी साड्यांपासून तुम्हीही लग्नसमारंभ आणि पार्ट्यांसाठी आकर्षक ड्रेस बनवू शकता. यामुळे तुमचा स्टाईल गेम एकदम हटके दिसेल.

प्रत्येक मुलीच्या कपाटात आईची किंवा आजीची एखादी तरी जुनी साडी असतेच. ती आता कोणी वापरत नाही, पण आठवण म्हणून जपलेली असते. त्या जड बनारसी, सिल्क किंवा ढाकाई जामदानी साड्यांची क्वालिटी आजकालच्या महागड्या कपड्यांनाही मागे टाकेल. त्यामुळे त्या जुन्या साड्या फेकून न देता, त्यांना एक नवीन आणि स्टायलिश रूप द्या. यामुळे तुमचा खर्चही वाचेल आणि तुम्ही फॅशनेबलही दिसाल.

जुन्या साडीपासून ५ आधुनिक ड्रेस बनवण्याच्या आयडिया:

१. डिझायनर लेहेंगा-चोली: आईची एखादी जड बनारसी किंवा कांजीवरम साडी असेल, तर तिचा वापर करून तुम्ही एक सुंदर लेहेंगा बनवू शकता. साडीच्या पदराचा वापर चोलीसाठी करा. लग्नसमारंभात किंवा कुठल्याही कार्यक्रमात हा लेहेंगा तुम्हाला एक रॉयल लूक देईल. चांगला टेलर ८०० ते १००० रुपयांमध्ये हा लेहेंगा शिवून देईल.

२. ट्रेंडी कुर्ती किंवा काफ्तान: सुती किंवा खादीच्या साडीपासून लांब कुर्ती किंवा काफ्तान बनवणं हा एक उत्तम पर्याय आहे. ऑफिस किंवा कॉलेजमध्ये घालण्यासाठी हे कपडे खूपच आरामदायी ठरतात. साडीचा काठ कुर्तीच्या बाह्यांवर किंवा खालच्या बाजूला लावल्यास डिझाइन आणखी सुंदर दिसेल.

३. शरारा आणि पलाझो सेट: आजकाल शरारा-गराराची फॅशन खूप ट्रेंडमध्ये आहे. आईच्या कोणत्याही सिल्क साडीपासून तुम्ही शरारा पॅन्ट शिवून घेऊ शकता. त्यावर एखाद्या प्लेन रंगाची कुर्ती घातल्यास तुमचा पूर्ण सेट एखाद्या बुटिकमधून घेतलेल्या ड्रेससारखा दिसेल.

४. स्टायलिश ब्लाउज: पूर्ण साडी वापरायची नसेल, तर फक्त पदराचा भाग कापून डिझायनर ब्लाउज शिवू शकता. एका चांगल्या डिझायनर ब्लाउजची किंमत १५०० ते २००० रुपये असते. पण जुन्या साडीपासून बनवल्यास तुमचा खर्च अर्ध्यावर येईल. कोणत्याही प्लेन साडीवर हा ब्लाउज घातल्यास तुमचा लूकच बदलून जाईल.

५. मुलांसाठी ड्रेस: आईच्या लाडक्या साडीपासून तुम्ही तुमच्या लहान मुलीसाठी छोटा लेहेंगा किंवा फ्रॉक बनवू शकता. यामुळे साडीची आठवणही जपली जाईल आणि तुमची मुलगी त्यात खूपच गोड दिसेल.

एक गोष्ट लक्षात ठेवा, साडी कापण्यापूर्वी ती ड्राय क्लीन करून घ्या. आणि अशा चांगल्या बुटिक किंवा टेलरकडे जा, ज्यांना जुन्या कपड्यांपासून नवीन ड्रेस बनवण्याचा अनुभव आहे.