Washing Machine Buying Guide : टॉप लोड की फ्रंट लोड? कोणती वॉशिंग मशीन वाचवेल तुमचं वीज बिल?

टॉप लोड आणि फ्रंट लोड वॉशिंग मशीनपैकी कोणती खरेदी करावी, याबाबत अनेकांचा गोंधळ उडतो. जी मशीन कमी वीज आणि कमी पाणी वापरते, ती घेणं कधीही फायद्याचं ठरतं. या दोन्हीपैकी तुमच्यासाठी कोणती मशीन बेस्ट आहे, ते सोप्या भाषेत समजून घ्या.

टॉप लोड vs फ्रंट लोड — नेमका फरक काय?

वॉशिंग मशीन खरेदी करताना टॉप लोड घ्यावी की फ्रंट लोड, असा प्रश्न अनेकांना पडतो. दोन्ही मशीन्स कपडेच धुतात, पण पाण्याचा वापर, कपडे धुण्याची पद्धत, सोय आणि किंमत यात मोठा फरक असतो.

टॉप लोड

या मशीनमध्ये आपण वरून कपडे टाकतो. यात कपडे टाकणं आणि काढणं खूप सोयीचं असतं.

फ्रंट लोड

या मशीनला समोरच्या बाजूला दरवाजा असतो. आत फिरणाऱ्या ड्रमच्या मदतीने ही मशीन कपडे धुते. ही मशीन खूप कमी पाण्यात कपडे स्वच्छ करते.

म्हणूनच, कोणती मशीन बेस्ट आहे हे ठरवण्यापूर्वी फक्त किंमत न पाहता वीज बिल, पाण्याचा खर्च आणि कपडे धुण्याची क्षमता या गोष्टींची तुलना आपण नक्की केली पाहिजे.

वीज बिल कशात कमी येतं?

विजेच्या खर्चाचा विचार केला तर, बहुतांश फ्रंट लोड वॉशिंग मशीन्स कमी वीज वापरतात. कमी पाणी वापरणं हे या मशीनचं मुख्य वैशिष्ट्य आहे. पण याचा अर्थ असा नाही की प्रत्येक फ्रंट लोड मशीन टॉप लोडपेक्षा कमीच वीज घेईल. मशीन घेण्यापूर्वी तिचं स्टार रेटिंग आणि ती किती वीज घेते, हे तुम्ही नक्की तपासलं पाहिजे.

कपड्यांचा मळ काढण्यात आणि धुतल्यानंतर कपडे लवकर सुकवण्यात फ्रंट लोड मशीन्स आघाडीवर असतात. ड्रममध्ये कपडे फिरवून धुण्याच्या पद्धतीमुळे, या मशीन्स कमी पाण्यातही कपडे एकदम स्वच्छ करतात. जास्त स्पिन स्पीड असलेल्या मॉडेल्समध्ये कपड्यातलं बहुतांश पाणी पिळून निघतं.

टॉप लोड मशीन्समध्येही मळ चांगला काढणारी मॉडेल्स उपलब्ध आहेत. पण पाण्याचा वापर, कपडे धुण्याची पद्धत आणि कपडे सुकवण्याची क्षमता यांची तुलना केली, तर फ्रंट लोड मॉडेल्स हा एक उत्तम पर्याय ठरतो. विशेषतः, रोज जास्त कपडे धुणाऱ्या मोठ्या कुटुंबांसाठी हे फरक खूप महत्त्वाचे ठरतात.

किंमत, पाणी आणि मेंटेनन्स

एकाच वेळी जास्त पैसे खर्च करायचे नसतील, तर टॉप लोड मशीन हा तुमच्यासाठी बेस्ट पर्याय आहे. याची किंमत थोडी कमी असते. आपण वरून कपडे टाकत असल्यामुळे वाकून काम करण्याची गरज पडत नाही. शिवाय, मशीन सुरू असताना विसरलेले कपडे मध्येच टाकण्यासाठी काही टॉप लोड मॉडेल्स खूप सोयीस्कर असतात.

पण, जर तुम्हाला दीर्घकाळात पाण्याचा खर्च वाचवायचा असेल, तर तुम्ही फ्रंट लोड मशीनचा विचार करू शकता. या मशीन्स खूप कमी पाणी वापरतात. मात्र, याच्या दरवाजाजवळ असलेली रबरी रिंग वेळोवेळी स्वच्छ करावी लागते. त्यामुळे, कमी बजेट आणि सोपा वापर हवा असेल तर टॉप लोड निवडा. आणि पाण्याची बचत व परफेक्ट वॉश हवा असेल तर फ्रंट लोड निवडा. तुमच्या गरजेनुसार योग्य तो निर्णय घ्या.