Hotel Booking Secrets : सर्व हॉटेलमध्ये चेक-इन आणि चेक-आऊट एकसारख का असतं? जाणून घ्या खरं कारण

तुम्ही हॉटेलमध्ये २४ तासांचे पैसे देता, पण तुम्हाला फक्त २२ तास मिळतात असं वाटतं का? चेक-इन १२ वाजता आणि चेक-आऊट १० वाजता का असतं, यामागचं खरं कारण हॉटेलचा फायदा नाही, तर तुमचीच सोय आहे. जाणून घ्या कसं.

आपण सगळेच कधी ना कधी हॉटेलमध्ये राहिलोय. तिथे एक गोष्ट नेहमी खटकते. चेक-इनसाठी दुपारी १२ वाजताची वेळ दिली जाते, पण रूम सोडायला सकाळी १० वाजताच सांगतात. असं वाटतं की पूर्ण २४ तासांचे पैसे देऊनही आपले दोन तास कापले गेले! मग हॉटेलवाले जास्तीचे पैसे कमावण्यासाठी ही चलाखी करतात का? तर, उत्तर आहे - नाही. ही कोणतीही चलाखी नाही. यामागे तीन अगदी व्यावहारिक कारणं आहेत.

हाऊसकीपिंगसाठी लागणारा वेळ

एखादा गेस्ट चेक-आऊट करून गेल्यानंतर, ती रूम पुढच्या गेस्टसाठी पूर्णपणे तयार करावी लागते. यामध्ये बेडशीट आणि टॉवेल बदलणं, बाथरूम सॅनिटाईझ करणं, फरशी पुसणं, मिनी-फ्रिज तपासणं आणि चहा-कॉफीचं सामान पुन्हा भरणं या सगळ्या गोष्टी येतात. एका सामान्य रूमला स्वच्छ करायला हाऊसकीपिंग स्टाफला साधारण ३० ते ४५ मिनिटं लागतात. म्हणजे, १० रूम्स असलेल्या हॉटेलमध्ये सगळ्या रूम्स तयार करायला ४ ते ५ तास सहज लागतात. सकाळी १० वाजता चेक-आऊट आणि दुपारी १२ वाजता चेक-इनमुळे स्टाफला काम करण्यासाठी हा महत्त्वाचा दोन तासांचा वेळ मिळतो.

लॉन्ड्री आणि मेंटेनन्ससाठी वेळ

रूममधील वापरलेली सगळी बेडशीट, उशांचे अभ्रे आणि टॉवेल धुलाईसाठी पाठवले जातात. याच वेळेत रूममधील छोट्या पण महत्त्वाच्या गोष्टी तपासल्या जातात - एसी व्यवस्थित चालतोय का? टीव्हीचं काय? नळ आणि लाईट्स नीट आहेत का? हा दोन तासांचा वेळ नसता, तर हॉटेलला पुढच्या गेस्टला आधीच्या गेस्टने वापरलेली अस्वच्छ रूम द्यावी लागली असती.

बिझनेसचं गणित: 'हॉटेल-डे' २४ तासांचा नसतो

हॉटेल इंडस्ट्रीमध्ये 'एक दिवस' म्हणजे मध्यरात्रीचे १२ ते दुसऱ्या दिवशीचे १२ असं गणित नसतं. हॉटेलचा 'दिवस' खरंतर चेक-आऊटच्या वेळेपासून सुरू होतो. उदाहरणार्थ, तुम्ही आज सकाळी १० वाजता चेक-आऊट केलं, तर हॉटेल ती रूम स्वच्छ करून त्याच रात्री दुसऱ्या गेस्टला भाड्याने देऊ शकतं. पण जर चेक-आऊट आणि चेक-इन दोन्ही दुपारी १२ वाजता असतं, तर वेळेचा काहीच फरक राहिला नसता. एखाद्याची फ्लाईट लेट झाली किंवा एखादा गेस्ट उशिरा आला, तर संपूर्ण सिस्टीम कोलमडली असती. शिवाय, सकाळी १० वाजता चेक-आऊट करणं सोयीचंही आहे. अनेक बिझनेस ट्रॅव्हलर्सना सकाळी लवकर निघावं लागतं आणि बऱ्याच फ्लाईट्सही सकाळच्या असतात. यामुळे हॉटेल्सना त्यांच्या रूम्स दिवसाच्या सुरुवातीलाच परत मिळतात.

मग यावर काही उपाय आहे का?

हो, नक्कीच आहे. बहुतेक हॉटेल्स अतिरिक्त शुल्क आकारून 'अर्ली चेक-इन' आणि 'लेट चेक-आऊट'ची सोय देतात. पण हे पूर्णपणे रूम उपलब्ध आहे की नाही यावर अवलंबून असतं. शेवटी, सकाळी १० ते दुपारी १२ या वेळेतला दोन तासांचा फरक तुमच्याच फायद्याचा आहे. यामुळे तुम्हाला एक स्वच्छ, ताजीतवानी आणि व्यवस्थित तयार केलेली रूम मिळते. हा हॉटेलच्या नफ्यापेक्षा त्यांच्या कामाच्या गरजेचा भाग जास्त आहे.