Marigold Care: झेंडूच्या झाडाला फुलं येत नाहीत? हि सोपी ट्रिक पहा वापरून, झाड जाईल फुलांनी भरून

तुमच्याही झेंडूच्या रोपाला फुलं येत नाहीत का? काळजी करू नका. योग्य प्रमाणात ऊन, कमी पाणी आणि घरातल्याच एका मोफत गोष्टीचा वापर करून तुम्ही रोपाला फुलांनी भरू शकता.

Marigold Flowering Tips: झेंडूची फुलं बागेची शोभा वाढवतात, पण अनेकदा झाड हिरवंगार असूनही त्याला फुलं येत नाहीत. यामागे चुकीची काळजी, जास्त पाणी किंवा चुकीचं खत ही कारणं असू शकतात. तुमच्या कुंडीत किंवा बागेत झेंडूची भरपूर फुलं यावीत असं वाटत असेल, तर नर्सरीवाल्यांकडून मिळालेल्या या सोप्या पण प्रभावी टिप्स नक्की वापरा.

झेंडूसाठी ऊन खूप गरजेचं आहे

झेंडूच्या रोपाला सूर्यप्रकाश खूप आवडतो. या रोपाला रोज किमान ५-६ तास थेट सूर्यप्रकाश मिळायला हवा. बाल्कनी किंवा गच्चीवर अशी जागा निवडा जिथे सकाळचं ऊन सहज मिळेल. कडक उन्हाळ्यात तुम्ही दुपारच्या तीव्र उन्हापासून थोडा बचाव करू शकता, पण तरीही रोपाला चांगला प्रकाश मिळणं महत्त्वाचं आहे. ऊन कमी मिळाल्यास फुलांचं येणं जवळजवळ थांबू शकतं.

योग्य प्रमाणात पाणी द्या

झेंडूच्या रोपाला जास्त पाणी चालत नाही. त्याची माती थोडी ओलसर असावी, पण चिखल नको. रोज पाणी देण्याची गरज नाही. जास्त पाण्यामुळे मुळं सडतात आणि झाड कमजोर होऊन फुलं देत नाही. नेहमी बोटाने माती तपासूनच पाणी द्या.

घरगुती खताने येतील भरपूर फुलं

झेंडूसाठी सर्वात प्रभावी खत म्हणजे शेणखत. गाईच्या शेणाच्या गौऱ्या तोडून दोन दिवस पाण्यात भिजवून ठेवा आणि नंतर तेच पाणी झाडाला घाला. असं दर २०-२५ दिवसांनी करा. शेणखत उपलब्ध नसेल, तर तुम्ही तुरटीचं पाणीही वापरू शकता. यामुळे झाडाला नवी ऊर्जा मिळते आणि फुलांची संख्या वाढते.

रोपासाठी महत्त्वाच्या टिप्स

• झाडाला किडीपासून वाचवण्यासाठी दर १०-१५ दिवसांनी कडुलिंबाच्या तेलाची (नीम ऑईल) फवारणी करा.
• जर तुम्हाला कोळी कीड (स्पायडर माइट्स) दिसली, तर लगेच कीटकनाशक वापरा.
• जास्त नायट्रोजनयुक्त खतं टाळा; त्यामुळे फक्त पानं वाढतात, फुलं येत नाहीत.
• कांद्याची सालं किंवा लसणाचं पाणी झेंडूसाठी हानिकारक ठरू शकतं.
• जर माती खूप ओली झाली असेल, तर ती हलकीशी खुरपून घ्या. यामुळे मुळांना हवा मिळेल.
• सुकलेली किंवा कोमेजलेली फुलं काढून टाकल्याने नवीन कळ्या येण्यास मदत होते.