Mongra Care: मोगऱ्याला बहरच येत नाहीये? या ५ चुका टाळा, झाड कळ्यांनी भरून जाईल!

तुमच्या मोगऱ्याच्या झाडाला फुलं येत नाहीत का? जास्त पाणी, कमी ऊन, चुकीची माती, नायट्रोजनयुक्त खत आणि छाटणी न करणं या ५ चुकांमुळे फुलं येणं थांबतं. योग्य काळजी घेतल्यास झाड वर्षभर कळ्यांनी भरून जाईल.

उन्हाळ्यात आपल्या अंगणात किंवा बाल्कनीत सुगंध पसरवणाऱ्या मोगऱ्याच्या पांढऱ्या शुभ्र फुलांसाठी आपण हे झाड लावतो. पण अनेकदा योग्य काळजी न घेतल्यामुळे झाडाला फक्त पानंच येतात आणि फुलं काही केल्या उमलत नाहीत. अनेकजण पाणी, ऊन किंवा खत देण्याबाबत छोट्या-छोट्या चुका करतात, ज्यामुळे झाड कमजोर होतं आणि त्याला फुलं येणंच थांबतं. जर तुम्हाला वाटत असेल की तुमचा मोगरा वर्षभर हिरवागार राहावा आणि फुलांच्या मोसमात कळ्यांनी भरून जावा, तर बागकाम करताना होणाऱ्या या सामान्य चुका नक्की टाळा.

जास्त पाणी देणे

मोगऱ्याच्या झाडाला जास्त पाणी अजिबात चालत नाही. रोज पाणी दिल्याने त्याची मुळं सडतात आणि झाड फुलं देणं बंद करतं. कुंडीतली माती कोरडी झाल्यावरच पाणी द्या. साधारणपणे उन्हाळ्यात २-३ दिवसांनी आणि हिवाळ्यात ४-५ दिवसांनी एकदा पाणी देणं पुरेसं आहे.

चुकीच्या मातीचा वापर

घट्ट आणि चिकट माती मोगऱ्याच्या झाडासाठी शत्रूसारखी आहे. नेहमी हलकी आणि पाण्याचा निचरा होणारी माती वापरा. यासाठी बागेतली माती, वाळू आणि कंपोस्ट खत समप्रमाणात मिसळून वापरा. कुंडीत पाणी साचून राहिल्यास मुळं खराब होतात आणि नवीन कळ्या उमलत नाहीत.

उन्हाची कमतरता

मोगरा हे उन्हात वाढणारं झाड आहे. जर तुम्ही त्याला सावलीत किंवा घराच्या आत ठेवलं, तर झाड वाढेल पण त्याला फुलं येणार नाहीत. रोज किमान ४ ते ६ तास ऊन मिळणं गरजेचं आहे. सकाळचं कोवळं ऊन या झाडासाठी सर्वोत्तम मानलं जातं.

जास्त नायट्रोजन असलेलं खत

जास्त नायट्रोजन असलेलं खत दिल्याने झाडाला फक्त पालवी फुटते, फुलं येत नाहीत. त्याऐवजी, महिन्यातून एकदा फॉस्फरस आणि पोटॅशयुक्त खत द्या. यासाठी तुम्ही बोनमील (हाडांचा चुरा) किंवा केळ्याच्या सालीचं पाणी वापरू शकता.

वेळेवर छाटणी न करणे

जुन्या आणि सुकलेल्या फांद्या झाडाची ऊर्जा वाया घालवतात. वर्षातून एकदा किंवा दोनदा हलकी छाटणी केल्यास नवीन फांद्या फुटतात आणि याच फांद्यांवर सगळ्यात जास्त कळ्या येतात.