Paneer Storage : फ्रिजमध्ये ठेवलेलं पनीर कडक आणि आंबट होतंय? १० दिवस ताजं ठेवण्याची सोपी ट्रिक

फ्रिजमध्ये पनीर ठेवूनही ते जास्त काळ ताजं राहत नाहीये का? त्याची चव आंबट किंवा ते कडक होतंय का? काळजी करू नका, या काही सोप्या टिप्स वापरून तुम्ही पनीर जास्त दिवस ताजं ठेवू शकता.

पनीर फ्रेश ठेवण्यासाठी खास टिप्स

जसं नॉन-व्हेज खाणाऱ्यांसाठी चिकन महत्त्वाचं, तसंच व्हेज खाणाऱ्यांसाठी पनीर! शाकाहारी लोक प्रोटीनसाठी पनीर जास्त खातात. पण बाजारातून आणलेलं पनीर फ्रिजमध्ये ठेवूनही दोन दिवसांतच खराब होतं. ते चिकट किंवा कडक होतं, कधीकधी बुरशीही लागते. पण काही सोप्या टिप्स वापरल्या तर पनीर दहा दिवस ताजं आणि कापसासारखं मऊ राहील. चला, त्या हॅक्सबद्दल जाणून घेऊया.

पनीर लवकर का खराब होतं?

पनीरमध्ये पाण्याचा अंश खूप जास्त असतो. त्यामुळे ते पॅकेटमधून काढून उघडं फ्रिजमध्ये ठेवलं की, फ्रिजमधली थंड हवा त्याला लवकर खराब करते. तसेच, फ्रिजचं तापमान स्थिर नसेल किंवा त्याला हवा लागली, तरी बॅक्टेरिया वाढतात आणि पनीरला आंबट वास येऊ लागतो. त्याचा रंगही लवकरच पिवळा पडतो.

पनीर ताजं ठेवण्यासाठी सोपी 'वॉटर हॅक'..

पनीर जास्त दिवस टिकवण्यासाठी पाण्यात ठेवणं हा सर्वोत्तम उपाय आहे. पनीरचे लहान तुकडे करून एका एअर-टाईट डब्यात ठेवा. त्यात पनीर पूर्ण बुडेल इतकं थंड पाणी घाला, झाकण घट्ट लावून फ्रिजच्या खालच्या कप्प्यात ठेवा. रोज डब्यातील पाणी बदलायला विसरू नका. पाणी बदलताना डबाही स्वच्छ केल्यास पनीर १० ते १२ दिवस खराब न होता ताजं राहतं. फक्त एका दिवसासाठी कसं साठवावं? दुसऱ्या दिवशी पनीर वापरायचं असेल, तर पाण्यात ठेवण्याची गरज नाही. पनीर एका स्वच्छ, हलक्या ओल्या कॉटन किंवा मलमलच्या कपड्यात गुंडाळा. ते हवाबंद डब्यात ठेवून फ्रिजमध्ये ठेवा. यामुळे ते सुकणार नाही आणि मऊ राहील.

पनीर स्टोअर करताना या चुका करू नका.. 

पनीरला प्लास्टिकच्या रॅपमध्ये घट्ट गुंडाळल्यास आतमध्ये ओलावा जमा होऊन बुरशी लवकर लागते. झाकण नसलेल्या भांड्यात ठेवल्यास पनीर फ्रिजमधील इतर भाज्या आणि पदार्थांचा वास शोषून घेतं. पनीरला आंबट किंवा विचित्र वास येत असेल, त्याचा रंग पांढऱ्याऐवजी पिवळा किंवा करडा झाला असेल किंवा ते चिकट लागत असेल, तर ते वापरू नका, ते खाण्यासाठी चांगलं नाही.