Bread Pakora Recipe : शिळ्या ब्रेडपासून १० मिनिटांत बनवा कुरकुरीत ब्रेड पकोडे, रोज बनवाल!

घरात शिळा ब्रेड उरलाय? तो फेकून देण्याऐवजी फक्त १० मिनिटांत दुकानासारखे कुरकुरीत ब्रेड पकोडे बनवा. संध्याकाळच्या नाश्त्यासाठी हा एक उत्तम पर्याय आहे, जाणून घ्या सोपी रेसिपी.

मुंबई : सकाळी आणलेला ब्रेड संध्याकाळपर्यंत शिळा झाला की आपण अनेकदा तो फेकून देतो. पण तुम्हाला माहितीये का, याच शिळ्या किंवा ताज्या ब्रेडपासून तुम्ही संध्याकाळच्या चहासोबत खाण्यासाठी दुकानासारखे कुरकुरीत ब्रेड पकोडे बनवू शकता? हे बनवायला खूप सोपे आहेत आणि खायलाही भन्नाट लागतात. मुलांच्या डब्यासाठी किंवा घरी पाहुणे आल्यावर देण्यासाठी हा एक उत्तम पर्याय आहे.

या पकोड्यांचं वैशिष्ट्य म्हणजे यासाठी खूप महागडे साहित्य लागत नाही. घरात उपलब्ध असलेल्या मोजक्याच साहित्यात हे पकोडे तयार होतात. हे पकोडे बाहेरून एकदम कुरकुरीत आणि आतून मऊ लुसलुशीत लागतात.

साहित्य:

१. शिळा किंवा ताजा ब्रेड - ६ स्लाइस २. बेसन - १ कप ३. तांदळाचे पीठ - २ चमचे (कुरकुरीतपणासाठी) ४. बारीक चिरलेला कांदा - १ मध्यम आकाराचा ५. बारीक चिरलेली हिरवी मिरची - २ ६. आलं-लसूण पेस्ट - १ चमचा ७. हळद - चिमूटभर ८. लाल तिखट - १/२ चमचा ९. चाट मसाला किंवा गरम मसाला - १/२ चमचा १०. बारीक चिरलेली कोथिंबीर - आवडीनुसार ११. मीठ - चवीनुसार १२. पाणी - गरजेनुसार १३. तळण्यासाठी तेल

कृती:

सर्वात आधी ब्रेडचे त्रिकोणी किंवा चौकोनी तुकडे करून घ्या. तुम्हाला हवे असल्यास तुम्ही याचे आणखी छोटे तुकडे करू शकता, जेणेकरून पकोडे अधिक कुरकुरीत होतील.

आता एका मोठ्या भांड्यात बेसन, तांदळाचे पीठ, हळद, लाल तिखट, चाट मसाला आणि मीठ एकत्र करून घ्या. यात बारीक चिरलेला कांदा, हिरवी मिरची, आलं-लसूण पेस्ट आणि कोथिंबीर घाला. आता थोडे थोडे पाणी घालत घट्ट पीठ (बॅटर) भिजवून घ्या. हे पीठ जास्त पातळ होणार नाही याची काळजी घ्या.

आता कापलेले ब्रेडचे तुकडे या बेसनाच्या पिठात चांगले बुडवून घ्या, जेणेकरून ब्रेडला सर्व बाजूंनी पीठ व्यवस्थित लागेल.

कढईत तेल गरम करा. तेल चांगले गरम झाल्यावर गॅस मध्यम आचेवर ठेवा. आता पिठात बुडवलेले ब्रेडचे तुकडे एक-एक करून तेलात सोडा. दोन्ही बाजूंनी सोनेरी आणि कुरकुरीत होईपर्यंत चांगले तळून घ्या.

गरमागरम ब्रेड पकोडे टोमॅटो सॉस किंवा कोथिंबिरीच्या चटणीसोबत सर्व्ह करा. एकदा खाल तर पुन्हा पुन्हा बनवून खाल!