Navratri 2025 : नवरात्रीची चौथी माळ; देवी कूष्मांडाची कथा, पूजा विधीसह मंत्र जपबद्दल घ्या जाणून

Shardiya Navratri 2025 : शारदीय नवरात्रीच्या चौथ्या दिवशी देवी कूष्मांडाची पूजा केल्याने जीवनात प्रकाश, आरोग्य आणि समृद्धी नांदते. भक्त जेव्हा श्रद्धा आणि भक्तिभावाने मंत्रजप करतात, तेव्हा देवी त्यांच्या सर्व संकटांचा नाश करून जीवन आनंदी करतात.

Shardiya Navratri 2025 : नवरात्रीच्या चौथ्या दिवशी देवी कूष्मांडा यांची उपासना केली जाते. पुराणकथेनुसार, सुरुवातीला संपूर्ण विश्व अंधकारमय होते. त्या वेळी देवीने आपल्या दिव्य हास्याने (उष्मा + अंड = कूष्मांडा) विश्वाची निर्मिती केली. म्हणूनच त्यांना सृष्टीची आदिशक्ती मानले जाते. देवीच्या आठ भुजा असून त्या विविध शस्त्रास्त्रांनी सज्ज आहेत. त्या सिंहावर आरूढ असून भक्तांना आरोग्य, आयुष्य आणि समृद्धी प्रदान करतात.

पूजा विधी

कूष्मांडा पूजेसाठी सकाळी लवकर उठून स्नान करून पवित्र वस्त्र धारण करावे. पूजा स्थळी देवीची प्रतिमा किंवा मूर्ती लाल वस्त्रावर प्रतिष्ठापित करावी. कलश स्थापन करून त्यावर नारळ व आम्रपल्लव ठेवावेत. देवीला गंध, अक्षता, धूप, दीप, नैवेद्य आणि विशेषतः माळीचे फुलं व गोड नैवेद्य अर्पण करावेत. पूजेदरम्यान दीप प्रज्वलित करणे अत्यंत शुभ मानले जाते.

मंत्रजप

देवी कूष्मांडाच्या पूजेत खालील बीजमंत्र जपला जातो:

“ॐ देवी कूष्माण्डायै नमः” हा मंत्र १०८ वेळा जपल्यास साधकाला आरोग्य, दीर्घायुष्य आणि आत्मबल लाभते. तसेच दुर्गा सप्तशतीचे पठण केल्यास विशेष फल प्राप्त होते.

उपासनेचे फायदे

कूष्मांडा पूजेमुळे जीवनातील अंधकार नाहीसा होऊन सकारात्मकता वाढते. व्यवसाय, करिअर आणि आयुष्यातील अडथळे दूर होतात. देवीच्या कृपेने साधकाला उत्तम आरोग्य, आयुष्याची दीर्घता आणि कुटुंबात सुख-शांती लाभते. या दिवशी दानधर्म केल्यासही विशेष पुण्य प्राप्त होते.