Glowing Skin Tips: महागड्या क्रीम्सला करा गुडबाय, दह्यात फक्त ही एक गोष्ट मिक्स करुन मिळवा चेहऱ्यावर ग्लो

प्रत्येकाला आपला चेहरा सुंदर आणि चमकदार दिसावा असं वाटतं. यासाठी महागड्या क्रीम्स वापरण्याची अजिबात गरज नाही. घरात सहज मिळणाऱ्या नैसर्गिक गोष्टी वापरून तुम्ही चेहऱ्याचं सौंदर्य वाढवू शकता.

त्वचेच्या सौंदर्यासाठी घरगुती उपाय

आपला चेहरा सुंदर दिसावा असं प्रत्येकालाच वाटतं. यासाठी अनेक जण बाजारात मिळणारे विविध प्रॉडक्ट्स वापरतात. पण महागड्या क्रीम्सवर पैसे खर्च करण्याऐवजी घरात उपलब्ध असलेल्या गोष्टींनी तुम्ही चेहऱ्याचं सौंदर्य वाढवू शकता. दही हा त्यापैकीच एक उत्तम पर्याय आहे. दह्यामध्ये नक्की काय मिसळून लावल्याने चेहरा उजळतो, ते आपण इथे जाणून घेणार आहोत.

दही आणि मधाचा फेसपॅक

दही आणि मधाचा फेसपॅक चेहऱ्याचं सौंदर्य दुप्पट करण्यासाठी खूप मदत करतो. दह्यामध्ये लॅक्टिक ॲसिड असतं. हे ॲसिड त्वचेच्या वरच्या थरावरील मृत पेशी काढून टाकण्याचं काम करतं. यामुळे त्वचा मऊ आणि ताजीतवानी दिसते. दही आणि मध प्रामुख्याने त्वचेला ओलावा देतात. मधातील अँटी-बॅक्टेरियल, अँटी-फंगल आणि अँटी-इन्फ्लेमेटरी गुणधर्म त्वचेसाठी खूप फायदेशीर ठरतात. मुरुमे आणि डाग कमी करण्यासाठी हा फेसपॅक अतिशय प्रभावीपणे काम करतो.

फेसपॅक बनवण्याची पद्धत

दही आणि मधाचा फेसपॅक बनवणं अतिशय सोपं आहे. सर्वांत आधी एका छोट्या वाटीत एक चमचा दही घ्या. त्यात अर्धा चमचा शुद्ध मध टाकून ते चांगलं मिसळा. हे मिश्रण चेहऱ्याला लावण्यापूर्वी चेहरा एका चांगल्या क्लिन्झरने स्वच्छ धुवून घ्या. त्यानंतर डोळे आणि ओठ सोडून चेहऱ्यावर याचा पातळ थर लावा. १० ते १५ मिनिटांनंतर कोमट पाण्याने चेहरा स्वच्छ धुवा. यानंतर त्वचेला सूट होणारे मॉइश्चरायझर नक्की लावा. हे मिश्रण रात्रभर चेहऱ्यावर ठेवू नका. तसेच रोज हा पॅक लावण्याची गरज नाही. आठवड्यातून फक्त २ वेळा याचा वापर पुरेसा आहे.

या लोकांनी काळजी घ्यावी!

दूध, दुधाचे पदार्थ किंवा मधाची ॲलर्जी असलेल्या लोकांनी हा फेसपॅक वापरू नये. फेसपॅक लावल्यानंतर जळजळ, खाज किंवा सूज आल्यास चेहरा लगेच धुवून टाका. चेहरा चमकदार दिसण्यासाठी फक्त बाहेरून लावलेले लेपच नाही, तर तुमच्या रोजच्या सवयीसुद्धा महत्त्वाची भूमिका बजावतात. तुम्ही पुरेशी झोप घेणे, संतुलित आहार घेणे आणि भरपूर पाणी पिणे आवश्यक आहे. तसेच उन्हात बाहेर जाताना सनस्क्रीनचा वापर नक्की करा.