Naivedya Rules : देवाला दाखवलेला नैवेद्य आरतीनंतर उचलावा की रात्रभर ठेवावा? शास्त्र काय सांगतं?

देवाला नैवेद्य दाखवून पूजा केली जाते. पण आरती झाल्यावर हा नैवेद्य लगेच बाजूला घ्यावा की रात्रभर देवापुढे तसाच ठेवावा? प्रसाद म्हणून तो कधी वाटावा? याबद्दल शास्त्र काय सांगतं, जाणून घेऊया.

नैवेद्य लगेच उचलायचा की ठेवायचा?

गणेशोत्सव, दिवाळी, नवरात्री असे सण एकामागोमाग एक येतात. घरात पूजा करताना अनेकदा काही गोष्टींवरून गोंधळ उडतो. नैवेद्य दाखवल्यावर तो आरतीनंतर लगेच उचलावा की थोडा वेळ ठेवावा, हा प्रश्न अनेकांना पडतो.

नैवेद्याचा प्रसाद वाटला जातो

प्रत्येक घरात शुभ मुहूर्तावर किंवा कौटुंबिक परंपरेनुसार पूजा होते. बहुतेक घरांमध्ये आरती झाली की नैवेद्य उचलून प्रसाद म्हणून सगळ्यांना वाटला जातो. ही एक सामान्य पद्धत आहे.

तुमची भक्ती सर्वात महत्त्वाची

शास्त्रानुसार, तुम्ही श्रद्धेने आणि प्रेमाने अर्पण केलेली कोणतीही गोष्ट देवाला नैवेद्य म्हणून चालते. भगवद्गीतेतील 'पत्रं पुष्पं फलं तोयं यो मे भक्त्या प्रयच्छति' या श्लोकानुसार, पान, फूल, फळ किंवा पाणी, जे काही भक्त श्रद्धेने अर्पण करतो, तोच नैवेद्य आहे. यात तुमची भक्ती सर्वात महत्त्वाची आहे.

नैवेद्य उचलून सर्वांना प्रसाद वाटल्यास पूजेचं फळ अधिक

श्रीमद् भागवत पुराणाच्या ११व्या स्कंधातील २७व्या अध्यायात दूध, तूप, दही, गूळ आणि मोदक अर्पण करण्याचा उल्लेख आहे. तसेच, भगवद्गीतेच्या तिसऱ्या अध्यायात देवाला अर्पण केलेला नैवेद्य प्रसाद म्हणून वाटण्याबद्दल सांगितलं आहे. आरतीनंतर नैवेद्य उचलून सर्वांना प्रसाद म्हणून वाटल्यास पूजेचं फळ अधिक मिळतं, असं मानलं जातं.

पूजेनंतर प्रसाद लगेच वाटावा

नैवेद्य रात्रभर देवापुढे ठेवण्याची पद्धत योग्य नाही. तो प्रसाद म्हणून भक्तांमध्ये वाटल्यास जास्त चांगलं. दूध-तुपाचे पदार्थ रात्रभर ठेवल्यास खराब होऊ शकतात. खराब झालेला नैवेद्य फेकून देणं योग्य नाही. तसेच, तो फ्रीजमध्ये ठेवून दुसऱ्या दिवशी खाणंही चुकीचं आहे. त्यामुळे पूजेनंतर लगेच प्रसाद वाटावा.