Watermelon Safety: प्रत्येक लाल टरबूज खाण्यासाठी चांगला नसतो! केमिकलवाल्या फळांना असं ओळखा

टरबुजामध्ये केमिकल आहे की नाही, हे ओळखणं आता सोपं झालं आहे. भेसळयुक्त टरबूज टाळण्यासाठी आणि आरोग्याचं नुकसान होण्यापासून वाचण्यासाठी या ५ सोप्या टिप्स नक्की जाणून घ्या.

उन्हाळा आला की टरबुजाची आठवण येतेच. पण सध्या एक बातमी चर्चेत आहे. नुकतंच मुंबईत टरबूज आणि बिर्याणी खाल्ल्यानंतर एकाच कुटुंबातील ४ जणांचा मृत्यू झाला. या प्रकरणाची चौकशी अजून सुरू आहे. त्यामुळे बाजारात मिळणाऱ्या टरबुजांबद्दल चिंता वाढली आहे. उन्हाळ्यात टरबुजाची मागणी खूप वाढते. पण याच काळात बाजारात केमिकल वापरलेली टरबूजं मोठ्या प्रमाणात येतात. मग आपल्या मनात प्रश्न येतो की, हे केमिकलवाले टरबूज खाऊन आपण आजारी तर पडणार नाही ना? जर तुम्हालाही ही भीती वाटत असेल, तर या काही सेफ्टी टिप्स नक्की वापरा.

रंग आणि टेक्स्चर तपासा

टरबुजाचा आतला रंग खूप जास्त भडक लाल असेल, तर तुम्ही सावध व्हायला हवं. नैसर्गिकरित्या पिकलेल्या टरबुजाचा रंग कुठे फिकट तर कुठे गडद असतो आणि त्याचा पोतही वेगळा दिसतो. याउलट, केमिकल टाकलेल्या टरबुजात काही ठिकाणी पांढऱ्या रेषांसोबत लाल रंग दिसू शकतो. टरबुजाच्या गरात पांढरे किंवा पिवळे धाग्यासारखे निशाण दिसल्यास ते केमिकल किंवा इंजेक्शन दिल्याचं लक्षण असू शकतं.

पाण्याने करा टेस्ट

टरबुजामध्ये रंग मिसळला आहे की नाही, हे पाण्याच्या टेस्टने समजू शकतं. यासाठी टरबुजाचा एक छोटा तुकडा कापून पाण्यात टाका. जर टरबुजात रंग मिसळलेला असेल, तर पाणी लगेचच लाल होऊ लागेल. याचाच अर्थ टरबुजामध्ये भेसळ केली आहे. 

सालीकडे लक्ष द्या

टरबुजाच्या सालीकडे बघूनही तुम्ही खऱ्या आणि बनावट टरबुजातील फरक ओळखू शकता. जे टरबूज खूपच चमकदार आणि दिसायला एकदम परफेक्ट असेल, ते विकत घेताना जरा काळजी घ्या.

केमिकलवाला टरबूज शरीरासाठी किती धोकादायक?

तुम्ही जर केमिकलवाला टरबूज सतत खात असाल, तर मोठा धोका निर्माण होऊ शकतो. उलट्या, जुलाब यांसारख्या समस्या लगेच दिसू लागतात. इतकंच नाही, तर दीर्घकाळ अशी केमिकल असलेली फळं खाल्ल्यास लिव्हर आणि किडनीवरही वाईट परिणाम होतो. नेहमी बाजारातून अख्खं टरबूज विकत घ्या. कापलेले टरबूज तुमच्या आरोग्यासाठी धोकादायक ठरू शकतात. ओळखीच्या किंवा विश्वासू दुकानदाराकडून टरबूज खरेदी केल्यास तुम्ही बऱ्याच अंशी सुरक्षित राहाल. खाण्यापूर्वी टरबूज एकदा नक्की तपासा. दिसायला एकदम परफेक्ट असलेल्या टरबुजांपासून सावध राहा. योग्य ओळख आणि थोडी जागरूकता तुम्हाला आणि तुमच्या कुटुंबाला सुरक्षित ठेवू शकते.