Hibiscus Oil : केस निरोगी आणि लांबसडक करण्यासाठी जास्वंदीच्या फुलांचं तेल, घरीच असं बनवा

केस निरोगी आणि लांबसडक हवे असतील तर तुम्ही जास्वंदीच्या फुलांपासून तेल बनवू शकता. यासाठी जास्त खर्चही येत नाही. जास्वंदीच्या फुलांचं हेअर ऑइल घरीच बनवून वापरणं खूप फायदेशीर ठरतं.

केस गळती रोखणारं तेल

बदलतं हवामान, वाढतं प्रदूषण आणि चुकीच्या खाण्यापिण्याच्या सवयी यामुळे आजकाल अनेक जण केसांच्या समस्यांनी त्रस्त आहेत. काहींचे केस खूप गळतात, तर काहींचे केस कोरडे आणि निर्जीव होतात, तसेच कोंड्याचा त्रासही जाणवतो. या समस्यांमधून बाहेर पडण्यासाठी अनेक जण महागडे केमिकल सीरम आणि हेअर मास्क वापरतात. पण यावर केमिकल नसलेला नैसर्गिक उपाय आपल्या घरातच उपलब्ध आहे, तो म्हणजे जास्वंदीचं तेल. एका अभ्यासानुसार, जास्वंदीचं तेल वापरल्याने टक्कल पडण्याची समस्याही कमी होण्याची शक्यता असते. हे जास्वंदीचं तेल तुम्ही घरीच अगदी सहज बनवू शकता.

जास्वंदीच्या फुलांचं तेल कसं बनवायचं

यासाठी एक कप खोबरेल तेल, आठ ते दहा जास्वंदीची फुलं आणि तेवढीच जास्वंदीची पानं घ्यावीत. खोबरेल तेलाऐवजी ऑलिव्ह ऑइल किंवा बदामाचं तेलही वापरता येतं. सर्वात आधी जास्वंदीची फुलं आणि पानं उन्हात किंवा पंख्याखाली चोवीस तास चांगली वाळवा. त्यानंतर मिक्सरमध्ये त्याची बारीक पावडर करा. आता गॅसवर एक भांडं ठेवून त्यात खोबरेल तेल गरम करा. तेल गरम झाल्यावर त्यात जास्वंदीची पावडर टाकून मंद आचेवर किमान दहा मिनिटं उकळा. यामुळे जास्वंदीतील सर्व पोषक घटक तेलात उतरतात. तेल पूर्णपणे थंड झाल्यावर गाळून एका काचेच्या बाटलीत साठवून ठेवा.

असा करा तेलाचा वापर

तयार केलेलं हे तेल योग्य पद्धतीने वापरल्यास चांगले परिणाम दिसतात. एका छोट्या वाटीत दोन चमचे तेल घेऊन कापसाच्या मदतीने टाळूवर म्हणजेच केसांच्या मुळांना चांगलं लावा. त्यानंतर बोटांनी पाच ते सहा मिनिटं हलक्या हाताने मसाज करा. तेल लावल्यानंतर चाळीस ते पंचेचाळीस मिनिटांनी सौम्य शाम्पूने केस धुवा. आठवड्यातून एकदा हे तेल वापरल्याने केस गळणं कमी होऊन मुळं मजबूत होतात. अधिक चांगल्या परिणामांसाठी रात्री तेल लावून दुसऱ्या दिवशी सकाळी केस धुणं उत्तम.