गॅस शेगडीच्या बर्नरवर साचलेला तेलकटपणा आणि काळे डाग तुम्ही घरातीलच काही वस्तू वापरून सहज काढू शकता. बर्नर नव्यासारखे कसे चमकवायचे, याच्या सोप्या टिप्स.
गॅस शेगडीच्या बर्नरवर तेल आणि अन्नाचे कण साचून ते काळे पडतात. ही स्वयंपाकघरातील एक अतिशय सामान्य समस्या आहे. यामुळे गॅसची ज्योत पिवळी पडते, काही भागातूनच जाळ येतो किंवा गॅसचा वेग कमी होतो. ही समस्या सोडवण्यासाठी तुम्ही घरातील व्हिनेगर, बेकिंग सोडा, लिंबू आणि डिशवॉश लिक्विडचा सहज वापर करू शकता.
24
घरगुती उपाय नक्की ट्राय करा
बर्नरवरील चिकट डाग काढण्यासाठी बेकिंग सोडा आणि लिंबाचा रस खूप फायदेशीर ठरतो. तुम्ही दोन चमचे बेकिंग सोड्यात गरजेनुसार लिंबाचा रस मिसळून घट्ट पेस्ट तयार करा. ही पेस्ट डाग पडलेल्या बर्नरवर लावा आणि १५ ते २० मिनिटे तशीच राहू द्या. त्यानंतर जुना टूथब्रश किंवा मऊ स्क्रबरने बर्नर हलक्या हाताने घासा. घरात उरलेली लिंबाची साल असेल, तर तिनेही तुम्ही हे डाग घासू शकता. बर्नर जास्त जोरात घासू नका, नाहीतर त्यावर ओरखडे पडू शकतात.
34
हट्टी डागांवर उपाय
डाग खूपच हट्टी असतील, तर तुम्ही व्हिनेगर आणि गरम पाण्याचा वापर करू शकता. गॅस बंद करा आणि बर्नर पूर्णपणे थंड झाल्यावरच ते बाहेर काढा. एका भांड्यात समप्रमाणात गरम पाणी आणि व्हिनेगर घ्या. त्यात बर्नर काही तास भिजत ठेवा. डागांच्या स्वरूपानुसार तुम्ही वेळ वाढवू शकता. यामुळे बर्नरच्या छोट्या छिद्रांमध्ये अडकलेले तेल आणि घाण सहज निघून जाते. रोजच्या वापरातील हलकी घाण काढण्यासाठी गरम पाण्यात थोडे डिशवॉश लिक्विड टाकून बर्नर २० ते ३० मिनिटे भिजत ठेवा. यामुळे अन्नाचे कण सहज निघून जातील.
भिजवलेले बर्नर तुम्ही नायलॉन स्क्रबर किंवा मऊ ब्रशने घासून स्वच्छ करू शकता. धातूचे कडक स्क्रबर वापरणे पूर्णपणे टाळा. धुतलेले बर्नर पूर्णपणे सुकल्यानंतरच पुन्हा गॅस शेगडीवर बसवा. ओले बर्नर चुकूनही वापरू नका. बर्नरच्या छिद्रांमध्ये अडकलेली घाण काढण्यासाठी सुईसारख्या टोकदार वस्तूने छिद्रे मोठी करणे धोकादायक ठरू शकते. बर्नर स्वच्छ करूनही गॅसची ज्योत नीट येत नसेल, तर स्वतः प्रयोग करण्यापेक्षा तज्ज्ञांना बोलावणे शहाणपणाचे ठरते. स्वयंपाक झाल्यावर शेगडी थंड होताच सांडलेले अन्न लगेच पुसून घेतल्यास बर्नर वारंवार ब्लॉक होण्यापासून वाचवता येते.
