Health Care : तुम्ही प्रोटीनचे मर्यादेपेक्षा अधिक सेवन करता? उद्भवतील आरोग्यासंबंधित या समस्या

Health Care : प्रोटीनचे सेवन करणे आरोग्यासाठी फयदेशीर मानले जाते. मात्र  जास्त प्रोटीनचे सेवन केल्यास रक्तातील विषारी घटक फिल्टर करणाऱ्या किडनीवर त्याचा मुख्य परिणाम होतो, असे नॅशनल किडनी फाउंडेशनने स्पष्ट केले आहे. 

Health Care : प्रोटीन हे शरीरासाठी एक महत्त्वाचे पोषक तत्व आहे. स्नायूंची दुरुस्ती, हार्मोन्सचे उत्पादन आणि ऊर्जा मिळवण्यासाठी प्रोटीन उपयुक्त ठरते. पण, याचे जास्त सेवन फायद्याऐवजी नुकसानकारक ठरू शकते. प्रोटीन मिळवण्यासाठी बाजारात अनेक प्रोटीन बार आणि शेक्स उपलब्ध आहेत. शरीरात जास्त प्रमाणात प्रोटीन गेल्यास कोणत्या आरोग्य समस्या उद्भवू शकतात, ते आता पाहूया.

किडनीची कार्यक्षमता कमी होते

जास्त प्रोटीन घेतल्यास रक्तातील विषारी घटक फिल्टर करणाऱ्या किडनीवर त्याचा मुख्य परिणाम होतो, असे नॅशनल किडनी फाउंडेशनने स्पष्ट केले आहे. उच्च-प्रोटीन आहारामुळे किडनीवर अतिरिक्त कामाचा भार वाढतो. अभ्यासानुसार, दीर्घकाळ जास्त प्रोटीनयुक्त आहार घेतल्यास किडनीची कार्यक्षमता कमी होऊ शकते.

प्रोटीनचे फॅट्समध्ये रुपांतर

जेव्हा शरीराला गरजेपेक्षा जास्त प्रोटीन मिळते, तेव्हा अतिरिक्त प्रोटीन चरबीच्या रूपात साठवले जाते. यामुळे हळूहळू वजन वाढू शकते. यामुळे एकूण कॅलरीजचे सेवन वाढते. निरोगी वजन नियंत्रणात ठेवण्यासाठी प्रोटीन, निरोगी फॅट्स आणि कर्बोदके यांचा समावेश असलेल्या संतुलित आहारावर लक्ष केंद्रित करा.

बद्धकोष्ठता किंवा पचनाची समस्या

उच्च-प्रोटीन आहारामध्ये अनेकदा फायबरचे प्रमाण कमी असते. फायबरच्या कमतरतेमुळे बद्धकोष्ठता आणि पचनाच्या समस्या उद्भवू शकतात. माफक प्रमाणात प्रोटीन सेवन करताना फायबरयुक्त पदार्थांचा आहारात समावेश करणे आणि पुरेसे पाणी पिणे पचनसंस्था सुरळीत ठेवण्यास मदत करते.

यकृताचे आरोग्य बिघडू शकते

उच्च-प्रोटीन आहारामुळे यकृताच्या आरोग्यावर परिणाम होऊ शकतो. कारण यामुळे यकृतावर ताण येऊ शकतो किंवा चरबी जमा होऊ शकते.

कर्करोगाचा धोका

जास्त प्रोटीनयुक्त आहारामुळे कर्करोगाचा धोका वाढू शकतो. JAMA इंटरनल मेडिसिनमधील एका अभ्यासानुसार, लाल मांस आणि प्रक्रिया केलेले मांस जास्त प्रमाणात खाल्ल्याने आतड्याचा, स्तनाचा आणि प्रोस्टेट कर्करोगाचा धोका वाढतो.

कोलेस्ट्रॉलच्या पातळीत वाढ

प्रोटीन, विशेषतः लाल मांस आणि फॅट्सयुक्त दुग्धजन्य पदार्थांचे जास्त सेवन केल्याने कोलेस्ट्रॉलची पातळी वाढते आणि कोरोनरी हृदयरोग होण्याचा धोका वाढतो, विशेषतः महिलांमध्ये. सॅचुरेटेड फॅट्सयुक्त उच्च-प्रोटीन आहारामुळे धमन्यांमध्ये प्लाक जमा होतो, ज्यामुळे रक्तप्रवाह बाधित होतो आणि रक्तदाब वाढू शकतो.

ऑस्टियोपोरोसिसचा धोका

मांसातून जास्त प्रमाणात प्रोटीन घेतल्याने हाडांमधून कॅल्शियम कमी होऊ शकते, ज्यामुळे कालांतराने हाडे कमकुवत होतात. जास्त प्रोटीन सेवन आणि हाडांचे आरोग्य बिघडणे यांच्यात संबंध आढळून आला आहे. कालांतराने, या कॅल्शियमच्या कमतरतेमुळे ऑस्टियोपोरोसिस आणि फ्रॅक्चरचा धोका वाढू शकतो.

(Disclaimer : सदर लेख केवळ सामान्य माहिती देण्याकरिता आहे. Asianet News या माहितीची जबाबदारी घेत नाही. अधिक माहितीसाठी आपण तज्ज्ञ किंवा आपल्या ओळखीच्या डॉक्टरांचा सल्ला घ्यावा)