तुम्ही Goa च्या या बीचला भेट दिली नाही तर तुम्ही काहीच बघितले नाही, अतिशय सुंदर बीचमध्ये होते गणना

Goa Travel Guide Calangute Beach : गोव्यामध्ये 'क्वीन ऑफ बीचेस' म्हणून ओळखला जाणारा कळंगुट बीच पाहिला नाही, तर तुमची गोवा ट्रिप अपूर्ण राहील. हा बीच इतका खास का आहे? इथे कधी जावं आणि कोणत्या वॉटर स्पोर्ट्सचा आनंद घ्यावा? जाणून घ्या.

गोवा ट्रिप: कळंगुट बीचबद्दल 'या' गोष्टी माहित आहेत का?

तुम्ही गोवा ट्रिपचा प्लॅन करत असाल, तर कळंगुट बीच तुमच्या लिस्टमध्ये असायलाच हवा. उत्तर गोव्यातील हा बीच 'क्वीन ऑफ बीचेस' म्हणून ओळखला जातो. इथे नेहमीच पर्यटकांची गर्दी असते. बीच शॅक्स, मस्त रेस्टॉरंट्स आणि लक्झरी रिसॉर्ट्समुळे हे ठिकाण नेहमीच गजबजलेलं असतं.

 **कळंगुट बीचवर कसे पोहोचाल?** 

गोव्याची राजधानी पणजीपासून हा बीच फक्त ११ किलोमीटरवर आहे. इथे पोहोचणं खूप सोपं आहे. • 

**विमानाने:** 

गोवा आंतरराष्ट्रीय विमानतळ इथून सर्वात जवळ आहे, जे बीचपासून सुमारे ४०.३ किमी अंतरावर आहे. विमानतळाबाहेर टॅक्सी किंवा कॅब बुक केल्यास एका तासात तुम्ही बीचवर पोहोचू शकता. • 

**ट्रेनने:** 

थिवीम रेल्वे स्टेशन बीचच्या जवळ आहे. जर तुम्ही मुख्य स्टेशन मडगावला उतरलात, तर तिथून ५० किमीचा प्रवास करावा लागेल. स्टेशनबाहेर बस आणि टॅक्सी सहज मिळतात. • 

**रस्त्याने:** 

पणजीपासून १५ किमी आणि वास्को द गामापासून ४० किमी अंतरावर हा बीच आहे. गोव्यात फिरण्यासाठी टू-व्हीलर किंवा फोर-व्हीलर भाड्याने घेणं हा सर्वोत्तम पर्याय आहे. तुम्ही प्रायव्हेट बसनेही जाऊ शकता.

कळंगुट बीचला भेट देण्याची सर्वोत्तम वेळ कोणती?

गोव्याचं हवामान नेहमीच बदलतं असतं. त्यामुळे तुमच्या बजेट आणि आवडीनुसार जाण्याची वेळ ठरवा. 

**ऑक्टोबर ते फेब्रुवारी** 

हा पीक सीझन असतो. हा गोव्याला भेट देण्यासाठी सर्वोत्तम काळ मानला जातो. हवामान थंड आणि सुखद असतं. वॉटर स्पोर्ट्स आणि साईटसीइंगसाठी ही योग्य वेळ आहे. विशेषतः ख्रिसमस आणि न्यू इयर सेलिब्रेशन इथे मोठ्या जल्लोषात साजरं होतं. त्यामुळे या काळात जात असाल तर हॉटेलचं बुकिंग आधीच करून ठेवा. 

**मार्च ते सप्टेंबर** 

हा ऑफ-सीझन असतो. उन्हाळ्यात ऊन खूप असतं, तर जुलै ते सप्टेंबरपर्यंत जोरदार पाऊस पडतो. पण कमी बजेटमध्ये ट्रिप करायची असेल, तर हा काळ उत्तम आहे. हॉटेलच्या रूम्स निम्म्याहून कमी किमतीत मिळतात. इनडोअर पब्स आणि नाईट लाईफ एन्जॉय करणाऱ्यांसाठी हा सीझन चांगला आहे.

कळंगुट बीचवरील थरारक वॉटर स्पोर्ट्स

कळंगुट बीच म्हणजे वॉटर स्पोर्ट्सचा अड्डाच! इथे तुम्हाला अनेक प्रकारचे वॉटर स्पोर्ट्सचे पर्याय मिळतील. 

1. **पॅरासेलिंग:** हवेत उडत बीचचं सुंदर दृश्य पाहण्याचा अनुभव घेऊ शकता. 

2. **कयाकिंग आणि विंडसर्फिंग:** समुद्राच्या लाटांवर स्वार होण्याचा थरार अनुभवता येतो. 

3. **स्नॉर्कलिंग:** समुद्राच्या आत डोकावून तिथलं सुंदर जग पाहू शकता. 

4. **वॉटर स्कीइंग:** पाण्याच्या पृष्ठभागावरून वेगाने सरकत जाण्याचा आनंद घेऊ शकता.

शॉपिंग आणि चमचमीत सी-फूडची चंगळ

शॉपिंगची आवड असणाऱ्यांसाठी कळंगुट मार्केट म्हणजे एक पर्वणीच आहे. इथे तुम्हाला टाय-डाय ड्रेस, फंकी ज्वेलरी, बोहेमियन बॅग्स आणि ड्रीम कॅचर्स कमी किमतीत मिळतील. खाण्यापिण्याच्या बाबतीत बोलायचं झालं, तर इथल्या बीच शॅक्समधील गोवा-स्टाईल सी-फूड नक्की ट्राय करा. विशेषतः प्रॉन्स, पापलेट फिश करी आणि फिश राईसची चव अप्रतिम असते. मंद संगीत ऐकत शांतपणे बसायला हे एक उत्तम ठिकाण आहे.

कळंगुट बीचची रंगीबेरंगी नाईट लाईफ

दिवसा कळंगुट बीच जितका गजबजलेला असतो, रात्री तितकाच रंगीबेरंगी आणि उत्साही होतो. संगीत, डान्स आणि लाईटिंगने सर्व बीच शॅक्स पार्टी मोडमध्ये जातात. पण जर तुम्हाला शांतता हवी असेल, तर इथे आयुर्वेदिक मसाज सेंटर्स आणि योगा क्लासेसचे पर्यायही उपलब्ध आहेत. समुद्राची हवा घेत योगा केल्याने मन ताजेतवाने होतं. बीचवर आरामात पडून सनबाथ घेणं हा देखील एक चांगला रिलॅक्सिंग अनुभव आहे.