Washing Machine Cleaning : तुमचं वॉशिंग मशीन काळं-पिवळं झालंय? या सोप्या ट्रिक्सने करा नव्यासारखं चकचकीत!

जे मशीन आपले कपडे धुवतं, त्यालाही स्वच्छतेची गरज असते! कालांतराने वॉशिंग मशीनमधून दुर्गंध येऊ लागतो आणि कपडेही फ्रेश वाटत नाहीत. पण काळजी करू नका, आम्ही काही सोप्या टिप्स सांगणार आहोत, ज्यामुळे तुमचं मशीन अगदी सहजपणे चमकेल!

टूथपेस्ट आणि लिंबू

एका अर्ध्या लिंबावर थोडी टूथपेस्ट लावा आणि वॉशिंग मशीनच्या आतल्या बाजूला चांगली घासा. त्यानंतर, फक्त पाण्याने एक रिकामी सायकल चालवा. मशीनचा ड्रम केवळ चमकेलच नाही, तर त्याला एक ताजा, लिंबाचा सुगंधही येईल.

माऊथवॉशचा वापर

डिटर्जंट डिस्पेंसरमध्ये माउथवॉशची दोन झाकणं टाका. त्यानंतर, मशीन 'क्विक वॉश' मोडवर चालवा. ही सोपी युक्ती डोळ्यांना न दिसणारे सर्व बॅक्टेरिया आणि बुरशी नष्ट करेल.

अॅप्पल साइडर व्हिनेगर

फ्रंट-लोड मशीनच्या रबर गॅस्केटमध्ये खूप घाण अडकते. हे स्वच्छ करण्यासाठी, एक सुती कापड ॲपल सायडर व्हिनेगरमध्ये बुडवा आणि रबरचा भाग पुसून घ्या. तुम्हाला काळे डाग लगेच नाहीसे झालेले दिसतील.

डिटर्जेंटचा बॉक्स स्वच्छ करा

डिटर्जंट पावडरचा बॉक्स वेगळा बाहेर काढा. गरम पाण्यात थोडा बेकिंग सोडा मिसळा आणि तो बॉक्स सुमारे १० मिनिटं भिजत ठेवा. नंतर, जुन्या टूथब्रशने त्यावर जमलेले साबणाचे कण घासून काढा. तो अगदी नव्यासारखा दिसेल!

मशीनमधील फिल्टर स्वच्छ करा

कपड्यांमधील धागे आणि नाणीसुद्धा मशीनच्या तळाशी असलेल्या फिल्टरमध्ये जमा होऊ शकतात. महिन्यातून एकदा हे फिल्टर उघडून कचरा साफ करण्याची सवय लावा. यामुळे तुमचं मशीन जास्त काळ टिकेल.

दुर्गंध टाळण्याचा सोपा मार्ग: कपडे धुऊन झाल्यावर मशीनचं दार लगेच बंद करू नका. कमीतकमी अर्धा तास ते उघडं ठेवल्यास आतला ओलावा सुकेल आणि बुरशीची वाढ पूर्णपणे थांबेल.