उन्हाळ्यात वॅक्सिंग करण्यापूर्वी 'या' गोष्टी लक्षात ठेवा, नाहीतर होऊ शकते त्वचेला हानी

वॅक्सिंग करण्यापूर्वी काही गोष्टींची काळजी घेतल्यास, त्वचेला होणारे नुकसान टाळता येते. या लेखात वॅक्सिंगपूर्वी त्वचा स्वच्छ करणे, एक्सफोलिएट करणे, मॉइश्चरायझर न वापरणे, घट्ट कपडे टाळणे, घामापासून बचाव करणे यासारख्या महत्वाच्या टिप्स दिल्या आहेत.

वॅक्सिंगपूर्वी त्वचा नीट स्वच्छ करा

वॅक्सिंग करण्यापूर्वी त्वचा पूर्णपणे स्वच्छ असणे आवश्यक आहे. त्वचेवर धूळ, घाम किंवा कोणतंही लोशन असेल, तर वॅक्सिंग नीट होणार नाही आणि त्यामुळे त्वचेला जळजळ किंवा रॅशेज येऊ शकतात. वॅक्सिंगपूर्वी सौम्य फेसवॉश किंवा स्क्रब वापरून त्वचा साफ करा.

त्वचा एक्सफोलिएट करायला विसरू नका

वॅक्सिंगच्या एक दिवस आधी त्वचेचं एक्सफोलिएशन करा. यामुळे मृत त्वचा (डेड स्किन) निघून जाते आणि केसांचे रंध्र स्वच्छ होतात, ज्यामुळे वॅक्सिंग सुलभ होतं आणि वेदनाही कमी होतात.

वॅक्सिंगपूर्वी मॉइश्चरायझर वापरू नका

उन्हाळ्यात त्वचा कोरडी होत असली तरी वॅक्सिंगच्या अगोदर मॉइश्चरायझर किंवा तेल लावणं टाळा. यामुळे वॅक्स त्वचेला नीट चिकटत नाही आणि केस व्यवस्थित काढले जात नाहीत.

वॅक्सिंगनंतर सूर्यप्रकाशापासून बचाव करा

वॅक्सिंगनंतर त्वचा अतिशय संवेदनशील होते. त्याच वेळी उन्हात जाणं त्वचेसाठी नुकसानदायक ठरू शकतं. त्यामुळे किमान २४ तास सूर्यप्रकाश टाळा आणि त्वचेला झाकून ठेवा, अन्यथा सनबर्न किंवा डार्क पॅचेस होऊ शकतात.

वॅक्सिंगनंतर घट्ट कपडे घालू नका

वॅक्सिंगनंतर त्वचेवर घर्षण होऊ नये म्हणून टाईट कपडे टाळा. अशा कपड्यांमुळे त्वचेला चुरचुर, रॅशेज किंवा लालसरपणा येऊ शकतो. हलके, कॉटनचे आणि सैलसर कपडे निवडा.

वॅक्सिंगनंतर कोल्ड कंप्रेस करा

जर वॅक्सिंगनंतर त्वचेला जळजळ होत असेल, तर बर्फ कापडात गुंडाळून सौम्यपणे त्वचेवर शेक द्या. यामुळे त्वचेला आराम मिळतो आणि सूज होण्याचा धोका कमी होतो.

घामापासून त्वचेचं रक्षण करा

वॅक्सिंगनंतर त्वचेला घाम येणं टाळा, कारण यामुळे जळजळ, संसर्ग किंवा खाज सुटण्यासारख्या समस्या निर्माण होऊ शकतात. त्यामुळे वॅक्सिंगनंतर लगेच जिम, योगा किंवा कोणतीही जड शारीरिक क्रिया करणं टाळा.