Towel Reuse Hacks: जुने टॉवेल फेकून देऊ नका! या ५ भन्नाट टिप्सने पैसे वाचतील आणि घरही सजेल

vivek panmand   | CMS
Published : Nov 20, 2026, 08:29 PM IST
old towel reuse ideas 5 amazing ways to use old towels at home hacks

सार

जुने टॉवेल खराब झाले म्हणून फेकून देऊ नका. त्याऐवजी त्यांचा वापर घरातील अनेक कामांसाठी कसा करता येईल ते जाणून घ्या. यामुळे तुमचे पैसेही वाचतील आणि घराच्या सजावटीलाही मदत होईल.

आपल्या सर्वांच्या घरात असे काही जुने टॉवेल असतात ज्यांचा रंग उडालेला असतो, ते पातळ झालेले असतात किंवा थोडे फाटलेले असतात. आपण सहसा ते फेकून देतो किंवा निरुपयोगी समजून कोपऱ्यात टाकून देतो. पण तुम्हाला माहिती आहे का, जुने टॉवेल फेकून देण्याची गोष्ट नाही. थोडी डोकं लावलं तर या जुन्या टॉवेलने घरातील अनेक महत्त्वाची कामे मार्गी लागू शकतात, ज्यामुळे तुमचा वेळ आणि पैसा दोन्ही वाचेल आणि ते पर्यावरणासाठीही चांगले आहे.

घरातील कामांसाठी जुने टॉवेल वापरण्याचे ५ उत्तम आणि प्रभावी उपाय:

१. फरशी पुसण्यासाठी आणि डस्टर म्हणून: हा सर्वात सोपा आणि लोकप्रिय वापर आहे. बाजारात मिळणाऱ्या फडक्यांपेक्षा जुन्या टॉवेलचे फडके जास्त पाणी शोषून घेते आणि खूप काळ टिकते. मोठा टॉवेल कापून फरशी पुसण्यासाठी वापरा. आणि छोटे छोटे तुकडे करून किचनमधील तेल-मसाले, गॅस किंवा बेसिन पुसण्यासाठी डस्टर बनवा. एकदा धुतलं की ते पुन्हा नव्यासारखं होतं.

२. हाताने बनवलेले मऊ पायपुसणे किंवा डोअरमॅट: बाजारातून महागडे पायपुसणे विकत घेण्याची गरज नाही. ३-४ जुने टॉवेल लांब कापून तीन भागात विभागून वेणीसारखे विणून घ्या. मग ते गोल फिरवून शिवून घ्या. तुमचं मऊ, आरामदायक आणि सुंदर डोअरमॅट तयार होईल. बाथरूमच्या किंवा दरवाजाच्या समोर ठेवल्यास ते पाणी शोषून घेईल आणि पाय घसरण्याची भीतीही कमी होईल.

३. पाळीव प्राण्यांसाठी आरामदायक बेड: घरात कुत्रा किंवा मांजर असेल तर त्यांच्यासाठी बेड बनवणे खूप खर्चिक काम असते. जुन्या टॉवेलने ते काम सोपे करा. एक मोठा टॉवेल दुमडून चारी बाजूने शिवून घ्या आणि त्यात आणखी काही जुने कपडे किंवा कापूस भरा. तुमच्या पाळीव प्राण्यासाठी मऊ, उबदार आणि आरामदायक बेड तयार. हिवाळ्यात त्यांना खूप आराम मिळेल.

४. किचनमधील स्मार्ट वापर: जुने टॉवेल कापून तुम्ही किचनमधील अनेक वस्तू बनवू शकता. जसे - हात पुसण्यासाठी छोटा टॉवेल, गरम भांडी धरण्यासाठी जाड हातमोजे (ग्लोज) किंवा अगदी सुंदर ॲप्रन सुद्धा. टॉवेलचे कापड जाड असल्यामुळे गरम भांडी धरण्यासाठी ते खूप सुरक्षित असते. तुम्हाला थोडं शिलाई काम येत असेल तर हे बनवणं खूप सोपं आहे आणि दिसायलाही छान वाटतं.

५. घराची सजावट आणि फर्निचरचे संरक्षण: खुर्ची, टेबल किंवा स्टूलच्या पायाखाली टॉवेलचे छोटे तुकडे लावले तर फरशीवर ओरखडे पडणार नाहीत आणि घासण्याचा आवाजही येणार नाही. याशिवाय कुंडीतील रोपांखाली ठेवल्यास पाणी सांडून फरशी घाण होणार नाही. तुम्हाला हवे असल्यास टॉवेल कापून स्टूल किंवा मोढ्यावर कव्हर म्हणून लावू शकता, यामुळे बसायलाही आराम मिळेल आणि जुन्या फर्निचरला नवीन लुक मिळेल.

त्यामुळे पुढच्या वेळी जुने टॉवेल फेकून देण्यापूर्वी या टिप्स नक्की वापरून पहा. थोड्या कल्पकतेने टाकाऊ वस्तूही घरातील कामाच्या वस्तू बनतील.

PREV
Lifestyle News in Marathi (जीवनशैली बातम्या): Get the latest lifestyle news updates, fashion trends, and beauty tips in Marathi. Read रिलेशनशिप टिप्स, हेल्थ टिप्स, Travel News & Watch Marathi Lifestyle Video at Asianet Marathi News.
Read more Articles on

Recommended Stories

Green Peas Roti: वाटाण्याची कचोरी खाल्ली असेलच, आता बनवा वाटाण्याची रोटी, भारी रेसिपी
Kidney Stone Symptoms : किडनी स्टोनच्या या लक्षणांकडे चुकूनही दुर्लक्ष करू नका