प्रसिद्ध YouTuber ध्रुव राठी Sikh history video मुळे अडचणीत, धार्मिक भावना दुखावल्याचा आरोप

दिल्ली शीख गुरुद्वारा व्यवस्थापन समितीने (DSGMC) त्यांच्याविरुद्ध तक्रार दाखल केली आहे आणि “धार्मिक भावना दुखावणाऱ्या वारंवारच्या गुन्ह्यांसाठी” त्यांच्या YouTube खात्याचा आढावा घेण्याची मागणी केली आहे.

नवी दिल्ली ः यूट्यूबर ध्रुव राठी हा रविवारी अपलोड केलेल्या ‘द शीख वॉरियर हू टेरीफाईड द मुघल्स’ या शीर्षकाच्या व्हिडिओमुळे अडचणीत सापडला आहे. एका प्रमुख शीख ऐतिहासिक व्यक्तीच्या शौर्यावर आणि वारशावर प्रकाश टाकण्याच्या उद्देशाने बनवलेल्या या व्हिडिओवर शीख समुदायाच्या काही वर्गातून तीव्र टीका झाली आहे. त्यांचा आरोप आहे की या व्हिडिओमध्ये शीख इतिहास चुकीचा दाखवण्यात आला आहे आणि धार्मिक भावना दुखावल्या आहेत.

प्रमुख शीख गट, इतिहासकार आणि सोशल मीडिया वापरकर्त्यांनी व्हिडिओच्या आशयावर नाराजी व्यक्त केली. दिल्ली शीख गुरुद्वारा व्यवस्थापन समितीने (DSGMC) त्यांच्याविरुद्ध तक्रार दाखल केली आहे. “धार्मिक भावना दुखावणाऱ्या वारंवारच्या गुन्ह्यांसाठी” त्यांच्या YouTube खात्याचा आढावा घेण्याची मागणी केली आहे. भारतीय जनता पक्षाने (भाजप) दिल्ली पोलिसांना या घटनेची एफआयआर नोंदवण्यास सांगितले आहे. अनेक संघटना आणि व्यक्तींनी व्हिडिओमध्ये आर्टिफिशियल इंटेलिजन्स (AI) च्या वापरावरही आक्षेप घेतला.

एक वापरकर्ता लिहितात, “तुम्ही नमूद केलेल्या ऐतिहासिक तथ्यांमध्ये मोठ्या चुका आहेत. त्यातल्या त्यात, तुम्ही आदरणीय शीख गुरूंची नावे ज्या पद्धतीने घेतलीत ती खूपच अपमानास्पद वाटते. एकंदरीत, असे दिसते की तुम्ही हा व्हिडिओ तुमचा AI कोर्स प्रमोट करण्यासाठी बनवला आहे. मी तुम्हाला सांगतो की तुम्ही AI वापरून तयार केलेली चित्रे आणि अ‍ॅनिमेशन खूपच वाईट दिसतात (मी स्वतः एक AI SaaS कंपनी चालवतो आणि सांगू शकतो की हा AI अ‍ॅनिमेशनचा एक दयनीय प्रयत्न आहे).”

व्हिडिओ खाजगी केला

राठीनं या गोंधळाला उत्तर म्हणून, अपलोड केल्यानंतर २४ तासांच्या आत व्हिडिओ खाजगी केला. त्यांनी अद्याप अधिकृतपणे जाहीर माफी मागितलेली नाही किंवा स्पष्टीकरण दिलेले नाही, ज्यामुळे काही समुदाय सदस्यांमध्ये नाराजी आणखी वाढली आहे.

शिरोमणी गुरुद्वारा प्रबंधक समिती (SGPC) आणि युवा संघटनांसह अनेक शीख वकिली गटांनी शीख इतिहासाची चर्चा करणाऱ्या कंटेंट निर्मात्यांकडून अधिक जबाबदारीची मागणी केली आहे.

एक निवेदन देताना, SGPC चे सरचिटणीस गुरचरण सिंग ग्रेवाल यांनी सांगितले की शीख समुदायाला त्यांचा समृद्ध इतिहास समजून घेण्यासाठी किंवा जतन करण्यासाठी AI-निर्मित कंटेंटची आवश्यकता नाही.

त्यांनी पुढे आरोप केला की व्हिडिओमध्ये गुरु तेग बहादूर जींचे शहीदी आणि बाबा बंदा सिंग बहादूर यांचा चिरस्थायी वारसा यासह प्रमुख ऐतिहासिक घटना विकृत करण्यात आल्या आहेत.

शिरोमणी अकाली दलाचे अध्यक्ष सुखबीर सिंग बादल यांनी व्हिडिओची तीव्र निंदा केली आणि असे चित्रण शीख रेहत मर्यादेचे थेट उल्लंघन असल्याचे म्हटले, जे गुरु साहिबांचे दृश्य चित्रण करण्यास सक्त मनाई करते. “त्यामुळे शीख समुदायाला तीव्र भावनिक त्रास झाला आहे. अपमानास्पद भाषेचा वापर आणि दिशाभूल करणाऱ्या कथांचा प्रसार केल्याने परिस्थिती आणखीच बिकट होते,” असे ते म्हणाले.

“चला आपण आदराने शिक्षण आणि जागरूकता वाढवूया, याची खात्री करून घेऊया की कोणत्याही समुदायाच्या श्रद्धा किंवा विश्वासांची अवहेलना होत नाही,” पंजाबचे माजी उपमुख्यमंत्री पुढे म्हणाले.